កំពង់ធំ ៖ លោក សុខ លូ អភិបាលខេត្តកំពង់ធំ បើកកិច្ចប្រជុំស្តីពីការដោះស្រាយផលប៉ះពាល់ដីជុំវិញគម្រោងវិនិយោគចំណតរថយន្ត និងស្តង់លក់ទំនិញ ស្ថិតនៅក្នុងភូមិសំពុង ឃុំប្រាសាទ និងភូមិប្រាំពីរមករា ឃុំតាំងក្រសាំង ស្រុកសន្ទុក ខេត្តកំពង់ធំនាថ្ងៃទី២៨ ខែសីហា ឆ្នាំ២០១៨នេះ។
ក្នុងកិច្ចប្រជុំនោះ លោកអភិបាលខេត្តកំពង់ធំ បានបញ្ចប់កិច្ចសន្យាខ្ចីដីក្រុមហ៊ុន ត្រឹង សាន ដែលសព្វថ្ងៃនេះ នៅក្នុងស្រុកសន្ទុក មិនទាន់មានទីតាំងចំណតចតរថយន្តទេ ហើយរថយន្តចតនៅតាមដងផ្លូវធ្វើឲ្យស្ទះចរាចរណ៍ មានគ្រោះថ្នាក់ចរាចរកើនឡើងជាញឹកញាប់ ហើយបងប្អូនអាជីវកម្មលក់ដូរមិនមានរបៀបរៀបរយ។
លោកបានថ្លែងថា ក្រុមការងារថ្នាក់ខេត្ត-ស្រុក គោលដៅត្រូវខិតខំរួមគ្នាគិតរួមគ្នាធ្វើ រួមគ្នាទទួលខុសត្រូវ ដើម្បីដោះស្រាយបញ្ហាការបញ្ចប់កិច្ចសន្យាខ្ចីដីរបស់ក្រុមហ៊ុន ត្រឹង សាន លើផ្ទៃដីទំហំ ១២.៦៦២ម៉ែត្រការ៉េ ដែលជាដីទ្រព្យសម្បត្តិរបស់ឃុំ ក្រោមការគ្រប់គ្រងរបស់ស្រុក ជូនក្រុមហ៊ុន ទង់ គឹមឡា តាមគោលការណ៍របស់រាជរដ្ឋាភិបាល ដើម្បីវិនិយោគសាងសង់ចំណតរថយន្ត និងស្តង់លក់ទំនិញ បម្រើផលប្រយោជន៍សាធារណៈជូនប្រជាពលរដ្ឋ ស្ថិតនៅភូមិប្រាំពីរមករា ឃុំតាំងក្រសាំង និងភូមិសំពុង ឃុំប្រាសាទ ស្រុកសន្ទុក ខេត្តកំពង់ធំ។ ក្រុមការងារពាក់ព័ន្ធទាំងអស់ ត្រូវខិតខំធ្វើការងារនេះ ឲ្យបានឆាប់រហ័ស និងប្រកបដោយប្រសិទ្ធភាព ដើម្បីសាងសង់ចំណតរថយន្ត និងស្តង់លក់ទំនិញ ជូនបងប្អូនអាជីវករ មានភាពងាយស្រួលកាត់បន្ថយការស្ទះចរាចរណ៍ និងចរចរណ៍ក្នុងផ្សារមិនមានការកកស្ទះ ទាំងអ្នកលក់ និងអ្នកទិញផងដែរ។
ជាមួយគ្នានោះដែរ លោកអភិបាលខេត្ត បានជំរុញឲ្យអាជ្ញាធរមានសមត្ថកិច្ច បន្តយកចិត្តទុកដាក់ចំពោះសន្តិសុខសណ្តាប់ធ្នាប់ ទប់ស្កាត់គ្រឿងញៀន និងឧក្រិដ្ឋកម្មផ្សេងៗ កែលម្អភាពអសកម្ម ខិតខំកសាងអំពើល្អ ផ្តល់សេវាសាធារណៈឲ្យមានប្រសិទ្ធភាពល្អ ជាពិសេសត្រូវរួមគ្នាដោះស្រាយទំនាស់ដីធ្លី ជូនប្រជាពលរដ្ឋឲ្យបានឆាប់រហ័ស និងទាន់ពេលវេលា៕ ដោយ ៖ បញ្ញាស័ក្តិ