កំពង់ចាម ៖ នៅថ្ងៃទី២៨ ខែសីហា ឆ្នាំ២០១៨ កម្លាំងចម្រុះមានកម្លាំងអធិការដ្ឋានគរបាលស្រុកបាធាយ កម្លាំងការិយាល័យប្រឆាំងបទល្មើសសេដ្ឋកិច្ចខេត្តកំពង់ចាម បានសហការជាមួយខណ្ឌរដ្ឋបាល ជលផលខេត្តកំពង់ចាម បានចុះបង្ក្រាបបទល្មើសនេសាទខុសច្បាប់(លូស្បៃមុង)នៅក្នុងភូមិសាស្ត្រ ឃុំត្រប់ ស្រុកបាធាយ ចំណុចបឹងស្រះហ៊ីង និងទំនប់ត្រពាំងប្រលិត។
ជាលទ្ធផលសមត្ថកិច្ចចម្រុះបង្ក្រាបបានរួមមានៈ លូស្បៃមុងចំនួន៥២មាត់ របាំងស្បៃមុងចំនួន ២.៨៥០ម៉ែត្រ បង្គោលចម្រឹងចំនួន៨៥៥ដើម ចាក់លែងកូនត្រីចំនួន៩៣គីឡូក្រាម ឧបករណ៍រ៉ាវ២១មាត់ របាំងរ៉ាវ១.២៥០ម៉ែត្រ បង្គោល ៣១៥ដើម និងកូនត្រី២១គីឡូក្រាម។
ចំពោះឧបករណ៍និងសម្ភារខុសច្បាប់ទាំងអស់ ដោយសុំការអនុញ្ញាតពីលោកព្រះរាជអាជ្ញា ដុតកម្ទេចចោលនៅចំណុចទួលប្ញស្សីច្រាញ់ភូមិសាស្ត្រ ឃុំត្រប់ ស្រុកបាធាយ ខេត្តកំពង់ចាម ។
នៅថ្ងៃដដែល កម្លាំងប៉ុស្តិ៍នគរបាលរដ្ឋបាលព្រែកបាក់ បានសហការជាមួយនាយសង្កាត់ព្រៃឈើ និងផ្នែករដ្ឋបាលជលផលខេត្តនិងសហគមន៍ឃុំព្រែកបាក់ ចុះបង្ក្រាបបទល្មើសនេសាទខុសច្បាប់ នៅចំណុចបឹងស្ថិតក្នុងភូមិព្រែករលួស និងភូមិព្រែកព្រះអង្គ។
ជាលទ្ធផលសមត្ថកិច្ចចម្រុះបង្ក្រាបបានៈ លបស្បៃមុងចំនួន៥៧មាត់ របាំងព្រួលប្រវែង៣.១៧០ម៉ែត្រ បង្គោលចំនួន២.៩២០ដើម និងចាក់លែងកូនត្រីប្រហែល២០៣គីឡូក្រាម។ ចំពោះសម្ភារទាំងនេះបាន ដុតបំផ្លាញចោលនៅហ្នឹងកន្លែង ៕ ដោយ ៖ បញ្ញាស័ក្តិ
