ខេត្តព្រះសីហនុ ៖ ប្រជាពលរដ្ឋប្រមាណ ៤២គ្រួសារ ដែលកំពុងអាស្រ័យផលជាក់ស្តែង នៅលើដីគម្របព្រៃឈើ (បទបញ្ជា០២) ឆ្នាំ២០០២ មានទីតាំងនៅភូមិគគី ឃុំបិទត្រាំង ស្រុកព្រៃនប់ រំពឹងថា នឹងទទួលបានយុត្តិធម៌ ខណៈពេលស្ថាប័នកំពូលៗ កំពុងដំណើរការនីតិវិធី ទោះបីពេលនេះមានមនុស្សមួយក្រុមតូច បានយកប័ណ្ណសំគាល់សិទ្ឋិអចលនៈទ្រព្យ ចេញនៅឆ្នាំ១៩៩៦ នៅចំណុចភូមិចំណោទរាម ឃុំបិតត្រាំង មកគ្របដណ្តប់នៅលើដីរបស់ពួកគាត់ ស្ថិតក្នុងភូមិគគី ឃុំបិតត្រាំងបែបណាក្តី។
ជុំវិញបញ្ហាខាងលើនេះ ក្រុមប្រជាពលរដ្ឋប្រមាណ ៤២គ្រួសារ បានបង្ហាញអារម្មណ៍ ប្រកបដោយភាពជឿជាក់ថា យុត្តិធម៌ពិតជាមាន បើទោះបីជាបច្ចុប្បន្ននេះ ត្រូវបានឈ្មោះ នូវ ឌឿន អតីតជាមន្ត្រីសាលាខេត្ត បាននឹងកំពុងលេងល្បែងបំភ័ន្តភ្នែក ជាមួយថ្នាក់ស្ថាប័នពាក់ព័ន្ឋមួយចំនួន ទាំងថ្នាក់ខេត្ត និងថ្នាក់ក្រសួង ដោយបានយកប័ណ្ណសំគាល់សិទ្ឋិ កាន់កាប់អចលនៈទ្រព្យ ដែលចេញនៅឆ្នាំ១៩៩៦ ចំនួន ០២ប័ណ្ណ នៅចំណុចភូមិចំណោទរាម ឃុំបិតត្រាំង របស់ក្រុមគ្រួសារមន្ត្រីជាន់ខ្ពស់ មកគំរាមកំហែង និងហ៊ុមព័ទ្ឋនឹងគ្របដណ្តប់លើដីរបស់ពួកគាត់ស្ថិតក្នុងភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុទៅវិញ។ ប្រជាពលរដ្ឋបានអះអាងទៀតថា កាលពីដីពុំទាន់មានហាងឆេង ឬមានតម្លៃខ្ពស់ និងពុំទាន់មានផ្លូវល្អ គឺពួកគាត់ពុំដែលបានឃើញ ភាគីណាផ្សេងចេញមកអះអាងថា ជាដីកម្មសិទ្ឋរបស់ខ្លួនម្តងណាឡើយ ប៉ុន្តែស្រាប់តែមកដល់ចុងឆ្នាំ២០១៧ ឈានចូលឆ្នាំ២០១៨ នេះ ស្រាប់តែដីមួយចំនួននៅចំណុច ក្នុងភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុ (អតីតដីគម្រប់បៃតងឆ្នាំ២០០២ ហើយត្រូវបានរាជរដ្ឋាភិបាលនិរាករចោលនូវរាល់ប័ណ្ណសំគាល់សិទ្ធិអចលនៈទ្រព្យទាំងឡាយណាចេញមុនឆ្នាំ២០០២) ត្រូវបានអ្នកមានអំណាចមួយក្រុម ដោយមានឈ្មោះ នូវ ឌឿន ដែលជាអ្នកតំណាង មកអះអាងថា ទីតាំងដីខាងលើនេះ គឺជាកម្មសិទ្ធិ របស់ ឈ្មោះ លោកស្រី អានី និងឈ្មោះ លោក ប៉ុនរិទ្ធ ហើយបានព្យាយាមមកវាតទីយកដី របស់ពួកគាត់ ដែលកំពុងកាន់កាប់នុង អាស្រ័យផលជាក់ស្តែង ស្ថិតនៅតំបន់ពយម៉ាចូវ ក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ដោយអ្នកទាំងពីរ សំអាងទៅលើប័ណ្ណសំគាល់សិទ្ធិកាន់កាប់អចលនវត្ថុលេខ៖ ពន០០២១១៥ (C1-0434) និងលេខ៖ ពន០០២១១៧(C1-0436) ចុះថ្ងៃទី ១៧ ខែឧសភា ឆ្នាំ១៩៩៦។
ប្រជាពលរដ្ឋបន្តថា តាមរយៈប័ណ្ណខាងលើនេះ គឺមានបញ្ជាក់ទីតាំងដីយ៉ាងច្បាស់ថា ជាដីស្ថិតនៅភូមិចំណោទរាម ឃុំបិតត្រាំង ស្រុកព្រៃនប់ ខេត្តព្រះសីហនុ។ពលរដ្ឋបន្តឲ្យដឹងទៀតថា ឈ្មោះខាងលើ ក្រៅតែពីបានព្យាយាមប្តឹងប្រជាជនក្នុងរឿងព្រហ្មទណ្ឌ និងរឿងរដ្ឋរប្បវេណី ដើម្បីជាការគំរាមកំហែង និងបំភិតបំភ័យប្រជាពលរដ្ឋឲ្យព្រមប្រគល់ដីទៅឲ្យខ្លួនដោយអយុត្តិធម៌ គឺលោក នូវ ឌឿន បានព្យាយាមរកគ្រប់មធ្យោបាយ ដោយបានរាយការណ៍ខុសការពិត ដើម្បីធ្វើយ៉ាងណាឲ្យខ្លួន ចូលមកកាន់កាប់ដីខុស ទីតាំងភូមិសាស្ត្រជាក់ស្តែង។
ប៉ុន្តែតាមការបញ្ជាក់របស់អាជ្ញាធរមូលដ្ឋាន ក្នុងឃុំបិតត្រាំ គឺលិខិតលេខ១២៥២/១៧ ឃបត ចុះថ្ងៃទី ០៩ ខៃតុលា ឆ្នាំ២០១៧ ស្តីពីការបញ្ជាក់អំពីទីតាំងភូមិសាស្ត្រព្រំប្រទល់ភូមិគគីរ និងភូមិចំណោទរាម ក្នុងឃុំបិតត្រាំង ស្រុកព្រៃនប់ ខេត្តព្រះសីហនុ គឺដីដែលប្រជាជនកំពុង កាន់កាប់ស្ថិតនៅក្នុងភូមិគគីរ ឃុំបិតត្រាំង ស្រុកព្រៃនប់ ខេត្ត ព្រះសីហនុ និងមានចំងាយ រហូតដល់ទៅប្រហែល ៦គីឡូម៉ែត្រ ទើបដល់ព្រំប្រទល់ភូមិចំណោទរាម។
ឆ្លើយតបទៅនឹងបញ្ហានេះ បើទោះបីជាមានការបញ្ជាក់ របស់អាជ្ញាធរមូលដ្ឋានលើនេះ ក៏ដោយ លោក នូវ ឌឿន នៅតែមិនទទួលស្គាល់ ការបញ្ជាក់ របស់អាជ្ញាធរមូលដ្ឋានឡើយ ដោយនៅតែប្រកែកថា ភូមិចំណោទរាម គឺជាភូមិគគីរ តែមួយ។ លោក នូវ ឌឿន បានបញ្ជាក់ថា ក្នុងនាមលោកជាអ្នកតំណាងម្ចាស់កម្មសិទ្ឋិ លោកទាមទាតែអ្វី ដែលជាកម្មសិទ្ឋិពិត ស្របទៅតាមច្បាប់ ដែលបានកំណត់ ទោះបីជាទីតាំងដីនេះ ស្ថិតក្នុងគម្របបៃតងយ៉ាងណាក្តី តែវាស្ថិតក្នុងកម្មសិទ្ឋិ ដ៏ដែលតាមរយៈលិខិតទិញលក់ឆ្នាំ២០០៨ ដោយសំអាងតាមប័ណ្ណសំគាល់សិទ្ឋិអចលនៈទ្រព្យចេញ នៅឆ្នាំ១៩៩៦ចំនួន ០២ប័ណ្ណ(ពន០០២១១៥ (C1-0434) និងលេខ៖ ពន០០២១១៧(C1-0436) ចុះថ្ងៃទី១៧ ខែឧសភា ឆ្នាំ១៩៩៦)។ ចំណែកឯប្រជាពលរដ្ឋទាំង ៤២គ្រួសារនេះ ទើបតែចូលមកទន្ទ្រានកាន់កាប់ចន្លោះ ឆ្នាំ២០១៤ និងឆ្នាំ២០១៦ តែប៉ុណ្ណោះ៕ ដោយ ៖ ដែន សីមា