ខេត្តព្រះសីហនុ៖ លោកឧកញ៉ា ទៀ វិចិត្រ បានបន្តនាំយកសត្វល្មិច ឬអណ្តើកសមុទ្រ មានទម្ងន់ជិត ៥០គីឡូក្រាម ១ក្បាលទៀត លែងចូលទៅក្នុងសមុទ្រធម្មជាតិវិញ នៅថ្ងៃអង្គារ៍ ទី២៨ ខែសីហា ឆ្នាំ២០១៨នេះ។
លោកឧកញ៉ាបញ្ជាក់ថា ការនាំយកយកសត្វល្មិច ឬអណ្តើកសមុទ្រ យកទៅលែងក្នុងសមុទ្រទឹកជ្រៅពេលនេះ គឺជាលើកទី៩៧ហើយៗ សរុបមានសត្វអណ្តើកសមុទ្ររាប់រយក្បាល ដែលរូបលោកបានជួយសង្គ្រោះជីវិត។
លោកឧកញ៉ា ទៀ វិចិត្រ ឲ្យដឹងដូច្នេះ រួចបញ្ជាក់ថា សត្វអណ្តើកសមុទ្រធំ ១ក្បាលនេះ គឺជាសត្វអណ្ដើក ដែលរូបលោកធ្លាប់បានលែងចូលទៅក្នុងសមុទ្រម្តងរួចមកហើយ ព្រោះរូបលោក បានកឹបសុីលចំណាំ ទៅតាមលក្ខណៈបច្ចេកទេស ដែលជលផលបានណែនាំ។
ប៉ុន្តែលោកថា សត្វអណ្ដើកសមុទ្រ១ក្បាលនេះ វាបានមកជាប់មង អ្នកនេសាទទៀត ហើយត្រូវបានប្រជានេសាទ បាននាំយកមកប្រគល់ជូនលោក និងបាននាំយកទៅលែង ក្នុងសមុទ្រទឹកជ្រៅវិញ។
លោកឧកញ៉ា ទៀ វិចិត្រ បន្តថា លោកបានជួយឧត្ថម្ភថវិកាមួយចំនួន ដល់បងៗ ជាអ្នកនេសាទ ដែលបានសហការផ្តល់សត្វអណ្តើកសមុទ្រ ១ក្បាលខាងលើមកឲ្យលោក ក៏ដូចជា ពេលកន្លងមកដែរ។
ព្រមជាមួយគ្នានេះ លោកឧកញ៉ា ទៀ វិចិត្រ ក៏បានថ្លែងសារអំពាវនាវបន្ថែមដល់គ្រប់សហគមន៍ ឬប្រជានេសាទទាំងអស់ ឲ្យចូលរួមថែរក្សាការពារអភិរក្សសត្វអណ្ដើកសមុទ្រ ដ៏កម្រគ្រប់ប្រភេទឲ្យបានទាំងអស់គ្នា។ ជាពិសេស លោកឧកញ៉ា បានសំណូមពរ កុំឲ្យសម្លាប់សត្វកម្រ ធ្វើជាអាហារ ឬការជួញដូរឆ្លងដែន តទៅទៀត ដើម្បីអភិរក្សទុកជាធនធានជលផលសមុទ្រ របស់ជាតិផង និងទុកជាបុណ្យកុសល ក្នុងការជួយសង្គ្រោះជីវិតសត្វផង៕ ដោយ៖ ដែន សីមា