ខេត្តព្រះសីហនុ ៖ បើនិយាយពីបញ្ហាសំរាម នៅក្នុងក្រុងព្រះសីហនុ បច្ចុប្បន្ននេះវិញ គឺបានទទួលរង នូវការរិះគន់ជាបន្តបន្ទាប់ ឬមិនសំចៃមាត់ពីសំណាក់ ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ជាពិសេសការរិះគន់តាមបណ្តាញទំនាក់ទំនងសង្គម Facebook។
ការរិះគន់ពីបញ្ហាសំរាមខាងលើនេះ បានកើតមាន បន្ទាប់ពីពួកគេបានឃើញកាកសំណល់សំរាម ត្រូវបានគេគរទុកចោល ឬកកស្ទះ នៅតាមចិញ្ចើមផ្លូវសាធារណៈ ក្នុងទីប្រជុំជនក្រុងទេសចរណ៍មួយនេះ គ្មានសណ្តាប់ធ្នាប់ និងជះក្លិនស្អុយដូចលាមក។ ក្នុងនោះរាប់បញ្ជូលទាំងសំរាមវេចខ្ចប់ត្រឹមត្រូវ បូករួមទាំងសំរាម ត្រូវគេបោះចោលអនាធិបតេយ្យតាមទីសាធារណៈផងដែរ។
ឆ្លើយតបការរិះគន់នេះ លោក ហេង ប៉េងហាក់ ប្រធានសាខាក្រុមហ៊ុន ប្រមូលសំរាម (K.S.W.M) ប្រចាំខេត្តព្រះសីហនុ បានឲ្យដឹងថា ក្រុមហ៊ុនលោកពិតជាកំពុងជួបប្រទះបញ្ហាយឺតយ៉ាវលើការងារប្រមូលសំរាមខ្លះៗពិតមែន នារដូវវស្សាឆ្នាំនេះ។ លោកថា ការយឺតយ៉ាវនេះ បណ្តាលមកពីបញ្ហាផ្លូវរថយន្ត បើកចូលទៅកន្លែងចាក់សំរាមមានការលំបាក និងមានចម្ងាយផ្លូវឆ្ងាយ ចេញពីទីក្រុងព្រះសីហនុ រហូតដល់ជាង ៣០គីឡូម៉ែត្រ។ ជាពិសេស លោកថា រាល់ថ្ងៃនេះ ផ្លូវចូលរថយន្តដឹកសំរាមយកទៅចាក់ចោល តែងជាប់ផុងរថយន្តស្ទើរជារៀងរាល់ថ្ងៃ ដោយសារដីរអិលមានភ្លៀង បែកភក់ខ្លាំង ធ្វើឲ្យមានការកកស្ទះ ស្របពេល ដែល រដូវធ្លាក់ភ្លៀងមិនទាន់អាចធ្វើផ្លូវធ្វើដំណើរចេញចូល បានល្អនៅឡើយទេ។
លោក ប៉េងហាក់ បន្តថា កត្តាមួយទៀត ដែលនាំឲ្យមានការប្រមូលសំរាមមានការយឺតយ៉ាវ គឺដោយសារតែបរិមាណសំរាម ក្នុងទីក្រុងព្រះសីហនុរាល់ថ្ងៃនេះ មានការកើនឡើងខ្លាំងមិននឹកស្មានដល់។
លោកបន្តថា បញ្ហាសំរាមនេះ បើគិតពីឆ្នាំ២០១៧កន្លងទៅ សំរាមមានត្រឹមតែ ១២០តោនតែប៉ុណ្ណោះក្នុង១ថ្ងៃ ប៉ុន្តែបើគិតមកដល់ខែកក្កដា និងខែសីហា ឆ្នាំ២០១៨នេះ សំរាមបានកើនឡើង រហូតដល់ ៦០០ទៅ ៧០០តោន ក្នុង១ថ្ងៃៗ។
លោក ប៉េងហាក់ ឲ្យដឹងដូច្នេះ រួចបញ្ជាក់ថា សម្រាប់សម្ភារៈ ឬរថយន្ត សម្រាប់បំរើដល់កាងាររប្រមូលសំរាម របស់ក្រុមហ៊ុនវិញ គឺបច្ចុប្បន្នមានរថយន្តទាំងតូចទាំងធំ កើនឡើងដល់ ២៤គ្រឿង និងគ្រឿងចក្រ សម្រាប់ កាយសំរាមមាន ៥គ្រឿង។
លោកបន្តថា ពេលនេះក្រុមហ៊ុន របស់លោក បានកម្មង់ទិញរថយន្តបន្ថែមជាច្រើនគ្រឿងទៀត ជាពិសេសក្រុមហ៊ុន ក៏បានជ្រើសរើសកម្លាំងកម្មករច្រើននាក់ថែមទៀត ដើម្បីបំពេញបន្ថែមចំណុចខ្វះខាត របស់ក្រុមហ៊ុនលើការងារប្រមូលសំរាម ឲ្យបានប្រសើរឡើងនៅថ្ងៃខាងមុខ។
យ៉ាងណាក៏ដោយចុះ លោក ប៉េងហាក់ រំពឹងជឿជាក់ថា បញ្ហាសំរាមកកស្ទះក្នុងក្រុងព្រះសីហនុ នឹងត្រូវបានដោះស្រាយ ក្រោយពេលរាំងភ្លៀង ជាពិសេសរាល់ការជួយជ្រោមជ្រែងសម្របសម្រួល លើបញ្ហាបច្ចេសទេស ពីថ្នាក់ដឹកនាំរដ្ឋបាលក្រុងព្រះសីហនុ ក៏ដូចជាថ្នាក់ដឹកនាំនៃរដ្ឋបាលខេត្តព្រះសីហនុជាបន្តបន្ទាប់មកនេះ៕ ដោយ៖ ដែន សីមា