នៅថ្ងៃទី ២៧ ខែសីហា ក្រសួងកសិកម្មអាមេរិក បានចេញសេចក្តីប្រកាសពីការចំណាយផ្ទាល់ ៤,៧ ពាន់លានដុល្លារ ក្នុងកញ្ចប់ឧបត្ថម្ភ ១២ពាន់លានដុល្លារ ដើម្បីជួយកសិករទប់ទល់នឹងការខាតបង់បណ្តាលមកពីវិធានការវាយពន្ធតបតនឹងអាមេរិកលើផលិតផលកសិកម្មរបស់មហាអំណាចចិន ។
វាលចម្ការសណ្តែកសៀងនៅ Coastvilk រដ្ឋ Maryland អាមេរិក ។
កសិករដាំសណ្តែកសៀងនឹងទទួលបានខ្ទង់ចំណាយខាងលើមួយផ្នែកធំ ប៉ាន់ស្មានប្រមាណ ៣,៦ ពាន់លានដុល្លារ ។
ចិនធ្លាប់ទិញផលិតផលសណ្តែកសៀងនាំចេញរបស់អាមេរិកប្រមាណ ៦០% តែពេលនេះបានថយចុះយ៉ាងខ្លាំង ព្រោះតែក្រុងប៉េកាំងបានបង្កើនអត្រាពន្ធលើមុខទំនិញនេះ ដើម្បីឆ្លើយតបជាមួយការបង្កើនពន្ធនាំចេញលើមុខទំនិញ ទៅកាន់អាមេរិករបស់ចិន ។
ថវិការដែលនៅសល់នឹងទុកឧបត្ថម្ភដល់ប្រភេទកសិផលកសិកម្មដទៃទៀត ដូចជាពោត ស្រូវសាលី និងកប្បាស ព្រមទាំងអ្នកចិញ្ចឹមជ្រូក និងគោយកទឹកដោះ ៕ ចន្ទ្រា