នៅថ្ងៃទី ២៨ ខែសីហា ម្សិលម៉ិញនេះ ប្រភពមិនបញ្ចេញឈ្មោះពីគណបក្សភឿថៃឲ្យដឹងថា គោលនយោបាយមួយសម្រាប់ដណ្តើមជោគជ័យក្នុងការបោះឆ្នោត នៅខែកុម្ភៈឆ្នាំ ២០១៨ គឺគណបក្សនេះ នឹងអះអាងប្រាប់ពលរដ្ឋថា ប្រសិនពួកគេទទួលជោគជ័យ នោះនឹងលក់នាវាមុជទឹក ដើម្បីយកលុយមកវិនិយោគលើផ្នែកសុខាភិបាល ។
អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា
ប្រភពដដែលឲ្យដឹងថានេះជាយុទ្ធសាស្ត្រមួយសម្រាប់ការប្រជែងរកសន្លឹកឆ្នោត ដែលលោកនាយករដ្ឋមន្ត្រីនិរទេសថាក់ស៊ីន បានលើកឡើងដល់គណបក្សភឿថៃ បំណងអូសទាញយកការគាំទ្រពីសំណាក់ពលរដ្ឋ ដែលពុំសប្បាយចិត្តនឹងការដែលរដ្ឋការយោធា មានផែនការទិញនាវាមុជទឹកបំពាក់ឲ្យកងយោធា ។
ឆ្នាំទៅម៉ិញ រដ្ឋការយោធាថៃ បានប្រកាសទិញនាវាមុជទឹក ៣គ្រឿងផលិតដោយប្រទេសចិន តែតម្រូវឲ្យទូទាត់តែ “២គ្រឿង” ក្នុងតម្លៃ ៣៦ពាន់លានបាត (ជាង១ពាន់លានដុល្លារ) ។ មតិជាច្រើនលើកឡើងថា នេះពុំជាតម្រូវការចាំបាច់ជាការចាយវាយខ្ជះខ្ជាយថវិការជាតិ ។
ប្រភពខាងលើនៅបានអះអាងថា លោកថាក់ស៊ីនមានជំនឿថា គណបក្សភឿថៃ អាចដណ្តើមបាន ២៦០អសនៈ/៥០០អសនៈ នៃរដ្ឋសភាព-ប្រហាក់ប្រហែលឆ្នាំ ២០១១ ៕ ចន្ទ្រា
