នេះជាខណៈពេលដ៏រន្ធត់មួយ នៅពេលដែលម៉ាស៊ីនយន្តហោះ ស្រាប់តែបានឆាបឆេះ ប៉ុន្មាននាទីបន្ទាប់ពីហោះចាកចេញពីព្រលាន និងបង្ខំឲ្យអ្នកដំណើរទាំងអស់ ២០០ នាក់ ត្រូវភាសខ្លួនចេញតាមផ្លូវរំអិលសង្គ្រោះបន្ទាន់ ខណៈយន្តហោះវិលត្រឡប់មកព្រលានវិញ និងចុះចតជាបន្ទាន់ ។
វីដេអូឃ្លីបបានបង្ហាញឲ្យឃើញភ្លើងបានកំពុងឆាបឆេះចេញពីផ្នែកខាងឆ្វេងនៃយន្តហោះ Red Wings ដែលនឹងត្រូវចុះចតនៅ Sochi ប្រទេសរុស្ស៊ី កាលពីព្រឹកថ្ងៃពុធ (២២ សីហា) ។
មនុស្សទាំងអស់ ២០២ នាក់ នៅលើយន្តហោះនេះ ត្រូវបានជម្លៀសដោយសុវត្ថិភាព នៅពេលយន្តហោះបានចុះចតនៅព្រលាន Ufa ។
អ្នកថតវីដេអូនេះបាននិយាយថា៖ «ខ្ញុំគឺជាអ្នកដំណើរម្នាក់ នៅលើជើងហោះហើរ ៨០៨ ចេញពីព្រលាន Ufa ទៅកាន់ Sochi នៅព្រឹកថ្ងៃពុធ» ។
គាត់បន្តថា៖ «ភ្លើងបានចាប់ផ្តើមឆាបឆេះចេញពីស្លាបយន្តហោះ ។ ពួកយើងពិតជាស្លុតរន្ធត់ខ្លាំងណាស់ នៅពេលភ្លើងកាន់តែរីករាលដាលឡើងៗរៀងរាល់វិនាទី» ។
គាត់បានបញ្ជាក់ថា៖ «ពុំមានជម្រើសផ្សេងណាមួយ ក្រៅពីវិលត្រឡប់មកព្រលាន Ufa វិញទេ ។ នៅពេលនោះ ពួកយើងបានចុះចតដោយសុវត្ថិភាព ខណៈស្លាបយន្តហោះស្ទើរតែរលាយទៅហើយ» ៕ ឧត្តម (thesun.co.uk)
