ខេត្តស្វាយរៀង ៖ លោក រស់ ផារិទ្ធ អភិបាលរងខេត្តស្វាយរៀងនាព្រឹកថ្ងៃអង្គារ ០២រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៨ ខែសីហា ឆ្នាំ២០១៨នេះ បានដាក់ចេញនូវវិធានការមួយចំនួន ដើម្បីដោះស្រាយបញ្ហាប្រឈមដែលអង្គភាពច្រកចេញចូលតែមួយបានជួបប្រទះនាពេលកន្លងមក ក្នុងន័យជំរុញ និងពង្រឹងការអនុវត្តកិច្ចការនានារបស់អង្គភាពឲ្យប្រព្រឹត្តទៅបានរលូន ល្អប្រសើរ ធានាដល់ការផ្ដល់សេវាជូនប្រជាពលរដ្ឋឲ្យបានកាន់តែឆាប់រហ័ស ទាន់ពេលវេលា ស្របតាមច្បាប់ លិខិតបទដ្ឋានគតិយុត្ត និងសេចក្ដីណែនាំនានាដែលរាជរដ្ឋាភិបាល និងក្រសួង-ស្ថាប័នបានដាក់ចេញពាក់ព័ន្ធនឹងអង្គភាពច្រកចេញតែមួយ។
ការដាក់ចេញនូវវិធានការទាំងអស់នោះខណៈដែលលោកបានអញ្ជើញជាអធិបតីក្នុងកិច្ចប្រជុំស្ដីពីការជំរុញ និងត្រួតពិនិត្យតាមដានការអនុវត្តការងាររបស់អង្គភាពច្រកចេញចូលតែមួយខេត្តនៅសាលប្រជុំសាលាខេត្តស្វាយរៀង។
ក្នុងកិច្ចប្រជុំនេះ មានការអញ្ជើញចូលរួមពីលោកនាយករងរដ្ឋបាលសាលាខេត្ត លោកប្រធានមន្ទីរវិស័យដែលពាក់ព័ន្ធនឹងសេវា ទាំង ១២ប្រភេទ លោកនាយកទីចាត់ការពាក់ព័ន្ធចំណុះសាលាខេត្ត លោកស្រីប្រធាន អនុប្រធាន និងមន្ត្រីជួរក្រោយ នៃអង្គភាពច្រកចេញចូលតែមួយខេត្ត ។
មានប្រសាសន៍ក្នុងប្រជុំនេះ លោកអភិបាលរងខេត្ត បានសម្ដែងនូវការកោតសរសើរ និងវាយតម្លៃខ្ពស់ចំពោះគ្រប់អង្គភាព និងមន្ត្រីពាក់ព័ន្ធទាំងអស់ ដែលបានខិតខំយកចិត្តទុកដាក់ និងសហការអនុវត្តការងារប្រកបដោយការទទួលខុសត្រូវ ធ្វើឲ្យអង្គភាពច្រកចេញចូលតែមួយដំណើរបានល្អប្រសើរក្នុងការផ្ដល់សេវាជូនប្រជាពលរដ្ឋ ដែលនៅមានបញ្ហាប្រឈមតិចតួចប៉ុណ្ណោះដែលត្រូវរួមគ្នាពិភាក្សា និងស្វែងរកនូវវិធានការដោះស្រាយនៅក្នុងកិច្ចប្រជុំនៅថ្ងៃនេះ ៕ ដោយ ៖ វ៉ៃកូ