ស្ថានីយវិទ្យុនិងទូរទស្សន៍កូរ៉េខាងត្បូងនៅថ្ងៃទី២៩ ខែសីហា បានដកស្រង់ការសម្ដែងមតិរបស់នាយកស្ថាប័នចារកម្មជាតិ កូរ៉េខាងត្បូង(NIS) លោកSuh Hoon ដែលបាននិយាយក្នុងអង្គប្រជុំរបស់ស្ថាប័ននេះនៅថ្ងៃ២៨សីហា ថា៖ ដំណើរទស្សនកិច្ចកូរ៉េ ខាងជើងរបស់ប្រមុខការទូតអាមេរិកត្រូវបានលុបចោល ព្រោះរវាងប្រទេសទាំងពីរមានគំលាតគ្នាខ្លាំងអំពីគោលជំហរ។
ក្នុងពេលដែលកូរ៉េខាងជើងសំណូមពរឱ្យអាមេរិកត្រូវធ្វើការប្រកាសបញ្ចប់សង្គ្រាមជាមុននោះ អាមេរិកបែរជាសំណូមពរ ឱ្យកូរ៉េខាងជើងត្រូវរំសាយនុយក្លេអ៊ែរជាមុនសិន។
តាមលោកSuh Hoon គឺថា ប្រសិនបើរដ្ឋការព្យុងយ៉ាងមានអាវុធនុយក្លេអ៊ែរ១០០ នោះគឺជាគោលដៅនៃការរំសាយនុយក្លេអ៊ែរនៅកូរ៉េខាងជើងគឺត្រូវរំសាយចោលអាវុធនុយក្លេអ៊ែរទាំង១០០នេះ។ជាគោលដៅជំហានទីមួយគឺត្រូវរំសាយអាវុធនុយក្លេអ៊ែរប្រមាណ៦០។
ទាក់ទិនដល់សន្និសីទកំពូលអន្តរកូរ៉េនោះ តាមគម្រោងនឹងប្រព្រឹត្តទៅនៅខែកញ្ញា នាក្រុងព្យុងយ៉ាង។ តាមលោកSuh Hoon ដដែលឱ្យដឹងថា នាឱកាសនោះប្រធានាធិបតី Moon Jae-inនឹងពិភាក្សាជំរុញការរំសាយនុយក្លេអ៊ែរនៅកូរ៉េខាងជើង៕
សូយន