ខេត្តព្រះសីហនុ ៖ កម្លាំងនគរបាលអន្តោប្រវេសន៍ របស់នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានសហការជាមួយកម្លាំងជំនាញ នៃស្នងការដ្ឋាននគរបាលខេត្តព្រះសីហនុ បានស្រាវជ្រាវមុខសញ្ញាបទល្មើសចាប់រំលោភក្មេងស្រីមិនទាន់គ្រប់អាយុ ដែលជនសង្ស័យជាបុរសជនជាតិអាមេរិកម្នាក់ បានមកសម្ងំលាក់ខ្លួន នៅខេត្តព្រះសីហនុ។ សមត្ថកិច្ច ឲ្យដឹងថា បទល្មើសចាប់រំលោភក្មេងស្រីជាអនីតិជន មិនគ្រប់អាយុ របស់បុរសជនជាតិអាមេរិកខាងលើនេះ ប្រព្រឹត្តឡើងនៅសហរដ្ឋអាមេរិកឯណោះ។
ទាក់ទិនសំណុំរឿងខាងលើនេះលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានឲ្យបណ្តាញសារព័ត៌មានដឹងនៅថ្ងៃទី៣០ ខែសីហា ឆ្នាំ២០១៨ថា ប្រតិបត្តិការ របស់សមត្ថកិច្ចបានចាប់ផ្តើមនៅម៉ោងជាង ៨យប់ថ្ងៃទី២៩ ខែសីហា ដោយមានការសម្របសម្រួលផ្លូវច្បាប់ដោយ លោកស្រី ចាត សូរស្មី ព្រះរាជអាជ្ញា នៃអយ្យការអមសាលាដំបូងខេត្តព្រះសីហនុ។
លោក អ៊ុក ហៃសីឡា បន្តថា បុរសជនជាតិអាមេរិក ដែលសមត្ថកិច្ចឃាត់ខ្លួនមានឈ្មោះ William David Brenner កើតថ្ងៃទី២១ ខែធ្នូ ឆ្នាំ១៩៥៥។ ហើយថា ការឃាត់ខ្លួននេះ ធ្វើឡើងនៅចំណុចរង្វង់មូលតោ២ ក្រុង-ខេត្តព្រះសីហនុ ដោយសមត្ថកិច្ចអនុវត្តតាមដីកាស្វែងរកចាប់ខ្លួន របស់សហរដ្ឋអាមេរិក ពីបទរំលោភផ្លូវភេទលើកុមារ ប្រព្រឹត្តិនៅសហរដ្ឋអាមេរិក។
លោកឧត្តមសេនីយ៍ឯក អ៊ុក ហៃសីឡា ឲ្យដឹងដូច្នេះ រួចបានបញ្ជាក់ថា ក្នុងប្រតិបត្តិការខាងលើនេះ ក៏មានកិច្ចសហការ ជាមួយការិយាល័យសន្តិសុខតំបន់ របស់សហរដ្ឋអាមេរិក Regional Security office (RSO) ប្រចាំស្ថានទូតសហរដ្ឋអាមេរិក ប្រចាំកម្ពុជា។
លោកបន្តថា ជនសង្ស័យជនជាតិអាមេរិកឈ្មោះ William David Brenner ត្រូវបានកម្លាំងនគរបាលជំនាញបញ្ជូនទាំងយប់ មកកាន់អគ្គនាយកដ្ឋានអន្តោប្រវេសន៍ ក្រសួងមហាផ្ទៃ ដើម្បីបន្តនីតិវិធី ឬឈានទៅបណ្តេញចេញពីប្រទេសកម្ពុជា ឲ្យចេញទៅសហរដ្ឋអាមេរិកវិញ៕ ដោយ៖ ដែន សីមា