ទីភ្នាក់ងារសារព័ត៌មាន TASS ដែលដកស្រង់ព័ត៌មានពីក្រសួងការពារជាតិរុស្ស៊ីនៅថ្ងៃទី៣០សីហានេះឱ្យដឹងថា នាវាប្រយុទ្ធលើផ្ទៃទឹកនិងនាវាមុជទឹកចំនួន២៥គ្រឿង រួមជាមួយយន្ដហោះ៣០គ្រឿង ដោយរួមមានទាំងយន្ដហោះទម្លាក់គ្រាប់បែកយុទ្ធសាស្ដ្ររបស់រុស្ស៊ីនឹងចាប់ផ្ដើមធ្វើសមយុទ្ធពីថ្ងៃទី១-៩កញ្ញា ។
សមយុទ្ធនេះប្រព្រឹត្តទៅនៅខណៈពេលដែលកើនឡើងភាពតានតឹងរវាងរុស្ស៊ីនិងលោកខាងលិចចំពោះស្ថានការណ៍ សមរភូមិនៅភាគខាងជើងរុស្ស៊ីដែលកំពុងតែក្ដៅគគុក។ប្រភពព័ត៌មានមួយដឹងថា នៅថ្ងៃទី២៩សីហា កងទ័ពរដ្ឋាភិបាលស៊ីរីបានបើកការវាយលុកទ្រង់ទ្រាយធំមួយដើម្បីកម្ចាត់ទ័ពឧទ្ទាមនិងភេរវករឱ្យចេញផុតពីកំពែងចុងក្រោយនេះ។
ក្នុងពេលជាមួយគ្នានោះ រុស្ស៊ីកំពុងខ្វាយខ្វល់ក្នុងការដែលអាមេរិកនិងសម្ព័ន្ធមិត្ដត្រៀមធ្វើការវាយប្រហារដែនអាកាសមួយ មកលើស៊ីរី។បើតាមអ្នកនាំពាក្យក្រសួងការបរទេសរុស្ស៊ី Maria Zakharova ថ្លែងក្នុងសន្និសីទសារព័ត៌មានល្ងាចថ្ងៃទី៣០សីហានេះ គឺអាមេរិកនិងសម្ព័ន្ធមិត្តអាចចំណាយពេលតែ២៤ម៉ោងប៉ុណ្ណោះដើម្បីបើកការវាយប្រហារមកលើស៊ីរី៕
លីសា