ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសំណើមួយដាក់ជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា សំណើសុំគោលការណ៍អនុញ្ញាតដ៏ខ្ពង់ខ្ពស់ ដើម្បីសិក្សាលទ្ធភាពរៀបចំបង្កើតខេត្តថ្មីចំនួន២ទៀត ដោយខេត្តមួយ កាត់ចេញពីខេត្តកណ្ដាល និងខេត្តមួយទៀត កាត់ចេញពីស្រុកកោះញែក ខេត្តមណ្ឌលគិរី និងស្រុកលំផាត់ ខេត្ដរតនគិរី។
សំណើរបស់សម្ដេចក្រឡាហោម ស ខេង ដាក់ជូន សម្តេចតេជោ ហ៊ុន សែន នៅថ្ងៃទី២៨ ខែសីហា ឆ្នាំ២០១៨។
សំណើរបស់សម្ដេចក្រឡាហោម ស ខេង ផ្ញើជូនសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាថា រាជរដ្ឋាភិបាលបានដាក់ចេញនូវសេចក្តីសម្រេចស្តីពីការបង្កើតគណៈកម្មការស្រាវជ្រាវកែសម្រួលព្រំប្រទល់រដ្ឋបាលថ្នាក់ក្រោមជាតិ ដែលគណៈកម្មការនេះដឹកនាំដោយរូបខ្ញុំផ្ទាល់។ គណៈកម្មការនេះ ជាសេនាធិការជូនរាជរដ្ឋាភិបាលក្នុងការកំណត់ និងកែសម្រួលព្រំប្រទល់រដ្ឋបាលថ្នាក់ក្រោមជាតិ និងរៀបចំបង្កើតរដ្ឋបាលថ្នាក់ក្រោមជាតិ។ នៅចំពោះមុខនេះ ផ្អែកតាមការពិនិត្យជាទូទៅលើស្ថានភាពភូមិសាស្ត្រ និងស្ថានភាពប្រជាសាស្ត្រ ខ្ញុំយល់ឃើញថា គួរឲ្យមានការសិក្សាលទ្ធភាពក្នុងការរៀបចំបង្កើតខេត្តថ្មីចំនួន២ ដើម្បីជួយលើកកម្ពស់ប្រសិទ្ធភាពនៃការគ្រប់គ្រងរដ្ឋបាល ការថែរក្សាសន្តិសុខ សណ្តាប់ធ្នាប់សាធារណៈ ការជំរុញអភិវឌ្ឍនៅមូលដ្ឋាន និងការផ្តល់សេវាសាធារណៈជូនប្រជាពលរដ្ឋ មានដូចខាងក្រោម ៖ ការសិក្សាពិនិត្យលទ្ធភាពក្នុងការបង្កើតខេត្តថ្មីមួយ ដោយបំបែកចេញពីខេត្តកណ្តាល និងការ សិក្សា លទ្ធផលក្នុងការបង្កើតខេត្តថ្មី ដោយពិនិត្យលើកត្តាភូមិសាស្ត្រ និងប្រជាសាស្ត្ររបស់ស្រុកកោះញែក នៃខេត្តមណ្ឌលគិរី និងស្រុកលំផាត់ នៃខេត្តរតនគិរី។ ក្នុងករណី សម្តេចតេជោ នាយករដ្ឋមន្ត្រី ឯកភាពជាគោលការណ៍លើគម្រោងបង្កើតខេត្តថ្មីទាំង២នេះ ក្រសួងមហាផ្ទៃ នឹងចាត់មន្ដ្រីបច្ចេកទេស ដើម្បីសហការជាមួយក្រសួង និងខេត្តពាក់ព័ន្ធ ចុះធ្វើការសិក្សាស្រាវជ្រាវជាក់ស្ដែង ដើម្បីរាយការណ៍សុំយោបល់ ដឹកនាំជាបន្ដបន្ទាប់ ពីសម្ដេចតេជោ ហ៊ុន សែន។
សម្តេចក្រឡាហោម បានបញ្ជាក់ថា “ខ្ញុំសូមគោរពជម្រាបជូន សម្តេចតេជោនាយករដ្ឋមន្ត្រី មេត្តាជ្រាបថាកិច្ចការនេះត្រូវរៀបចំឲ្យបានចប់សព្វគ្រប់ នៅខែមករា ឆ្នាំ២០១៩ ដើម្បីទុកពេលវេលាសមស្របសម្រាប់រាជរដ្ឋាភិបាល កំណត់ចំនួនអាសនៈ ក្រុមប្រឹក្សា។
សូមជម្រាបថា បច្ចុប្បន្ននេះកម្ពុជា មានខេត្តចំនួន២៤ និងរាជធានីមួយ ៕ ដោយ ៖ កូឡាប
