ប៉ូលីសនៅក្នុងប្រទេសហ្វីលីពីន បានកំពុងល្បាតនៅផ្លូវ Payatas កាលពីព្រឹកព្រលឹមថ្ងៃព្រហស្បតិ៍ (៣០ សីហា) នៅពេលនោះ ពួកគេក៏បានប្រទះនឹងស្ត្រីម្នាក់ស្ថិតក្នុងស្ថានភាពអាក្រាតល្វែងលើ ខណៈស្រែកហៅរកជំនួយសង្គ្រោះយ៉ាងត្រដាបត្រដួស ។
ប៉ូលីសបានឆ្លើយតបយ៉ាងលឿន ហើយបានដឹងថា ស្ត្រីនោះកំពុងរត់គេចចេញពីពួកជនតាមប៉ុនប៉ងរំលោភនាង ។
ស្ត្រីរងគ្រោះបានរៀបរាប់ឲ្យដឹងថា នាងកំពុងដើរតាមផ្លូវ Madjaas នៅពេលនោះ ស្រាប់តែមានបុរស២នាក់ បានមកពាំងផ្លូវនាង ហើយស្រែកឡើងថា «ប្លន់ៗ» ។
ដោយពុំមានលុយ១កាក់១សេននៅក្នុងខ្លួន ផ្តល់ឲ្យ នាងក៏បានសុំអង្វរពួកវា ។
នាងបានប្រាប់ប៉ូលីសថា៖ «ខ្ញុំបានសុំអង្វរបុរស២នាក់នោះ ដោយនិយាយថា ខ្ញុំពុំមានលុយទេ សូម្បីតែមួយសេននៅនឹងខ្លួន ខ្ញុំអ្នកក្រ ខ្ញុំរត់ចេញពីផ្ទះ ដោយគ្មានលុយជាប់មកជាមួយទេ» ។
ប៉ុន្តែ នាងបាននិយាយថា ជនសង្ស័យទាំង២នេះ ពុំបានលើកលែងឲ្យនាងទេ ដោយម្នាក់ក្នុងចំណោមពួកគេ បានយកកាំភ្លើងខ្លីភ្ជង់នាង និងបង្ខំឲ្យនាងឡើងជិះម៉ូតូ ដែលបានបណ្តាលឲ្យនាងត្រូវរបួសជើង ។
បុរសម្នាក់បានទៅមើលកន្លែងកើតហេតុ និងបានរាយការណ៍ពីសកម្មភាពចាប់ពង្រត់នេះយ៉ាងលឿន ទៅដល់អាជ្ញាធរក្នុងតំបន់ ។
ប៉ូលីសបានរកឃើញជនសង្ស័យទាំងពីរ កំពុងលាក់ខ្លួនៅក្នុងទីងងឹតមួយ នៃជាតំបន់វាលស្មៅ ទីកន្លែងដែលជនរងគ្រោះត្រូវបានអូសចូលមុននេះ ។
ការផ្ទុះអាវុធដាក់គ្នាបានផ្ទុះឡើងមួយប្រាវ ដែលជាលទ្ធផល បណ្តាលឲ្យជនប៉ុនប៉ងរំលោភទាំងពីរស្លាប់នៅនឹងកន្លែង ។
ប៉ូលីសប៉ុស្តិ៍ Batasan បានលើកទឹកចិត្តសាធារណជន ឲ្យខលទៅកាន់ពួកគេតាមរយៈលេខ 931-7870 សម្រាប់ស្ថានការណ៍បន្ទាន់ ៕ ឧត្តម (untvweb)