ខេត្តស្វាយរៀង ៖ លោក រស់ ផារិទ្ធ អភិបាលរង នៃគណៈអភិបាលខេត្តស្វាយរៀង តំណាងលោក ម៉ែន វិបុល អភិបាលខេត្ត និងជាប្រធានគណៈកម្មាធិការខេត្តជំរុញចលនាភូមិ១ផលិតផល១ខេត្តស្វាយរៀងនាព្រឹកថ្ងៃសុក្រ ០៥រោច ខែស្រាពណ៌ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣១ ខែសីហា ឆ្នាំ២០១៨នេះ បានសម្ដែងនូវការអរគុណចំពោះ OVOP NIPTICT និងCIESF ដែលបានសហការរៀបចំនូវវគ្គបណ្ដុះបណ្ដាលផ្នែកគ្រប់គ្រងសហគ្រិន និងផ្ដួចផ្ដើមឲ្យស្ដ្រីប្រើប្រាស់បច្ចេកវិទ្យាគមនាគមន៍ព័ត៌មានវិទ្យា នៅក្នុងខេត្តស្វាយរៀង នាពេលនេះ ។ ហើយលោកអភិបាលរងខេត្ត ក៏បានបង្ហាញនូវសុទិដ្ឋិនិយមថា តាមរយៈវគ្គបណ្ដាលនេះ នឹងផ្ដល់នូវវិភាគទានដ៏សំខាន់ក្នុងការចូលរួមចំណែកអភិវឌ្ឍន៍ធនធានមនុស្ស ជាពិសេសស្ត្រី តាមរយៈការពង្រឹងសមត្ថភាពផ្នែកមូលដ្ឋានគ្រឹះ និងជំនាញបច្ចេកវិទ្យា សម្រាប់ការរីកចម្រើនសេដ្ឋកិច្ចនៅមូលដ្ឋាន ។
លោកអភិបាលរងខេត្តបានមានប្រសាសន៍ដូច្នេះក្នុងឱកាសដែលលោកបានអញ្ជើញជាអធិបតីនៅក្នុងពិធីបើកវគ្គបណ្ដុះបណ្ដាលផ្នែកគ្រប់គ្រងសហគ្រិន និងផ្ដួចផ្ដើមឲ្យស្ដ្រីប្រើប្រាស់បច្ចេកវិទ្យាគមនាគមន៍ព័ត៌មានវិទ្យា ដែលពិធីនេះបានប្រព្រឹត្តទៅនៅសាលប្រជុំសាលាខេត្តស្វាយរៀង។
ពិធីនេះក៍មានការអញ្ជើញចូលរួមផងដែរពីសំណាក់លោកបណ្ឌិត សួង ណយ អគ្គលេខាធិការរង គណៈកម្មាធិការជាតិជំរុញចលនាភូមិ១ផលិតផល១ និងលោក FUSE Makoto ប្រធានគម្រោងរបស់អង្គការ Cambodia International Education Support Foundation (CIESF) ។
លោករស់ ផារិទ្ធ បានមានប្រសាសន៍បន្តទៀតថាៈ តាងនាមលោក ម៉ែន វិបុល អភិបាលខេត្ត លោកសូមស្នើដល់សិក្ខាកាមទាំងអស់ ត្រូវខិតខំយកចិត្តទុកដាក់ត្រងត្រាប់ស្ដាប់នូវគ្រប់បទឧទ្ទេសនាមរបស់គ្រូឧទ្ទេស និងវាគ្មិនទាំងអស់ នៃវគ្គបណ្តុះបណ្តាលនៅពេលនេះ ព្រមទាំងត្រូវចូលរួមពិភាក្សា និងសួរដេញដោលឲ្យបានផុសផុលក្នុងក្របខ័ណ្ឌនៃប្រធានបទនៅថ្ងៃនេះ ដើម្បីស្វែងយល់ និងចាប់យកចំណុចគន្លឹះសម្រាប់យកទៅប្រើប្រាស់ក្នុងកិច្ចការងារ ក៏ដូចជាមុខរបរ និងអាជីវកម្មរបស់ខ្លួន ឲ្យកាន់តែមានភាពជោគជ័យ និងរីកចម្រើនថែមទៀត។
សូមបញ្ជាក់ផងដែរថា ៖ វគ្គបណ្ដុះបណ្ដាលនេះសហការរៀបចំដោយគណៈកម្មាធិការជាតិជំរុញចលនាភូមិ១ផលិតផល១ (OVOP) វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) និងអង្គការ CIESF និងមានការអញ្ជើញចូលរួមពីថ្នាក់ដឹកនាំ មន្ត្រីជំនាញ និងបុគ្គលិក នៃអង្គភាពទាំងបី លោក លោកស្រីប្រធានមន្ទីរ-អង្គភាពនានាក្នុងខេត្ត លោកអភិបាលក្រុង ស្រុក ប្រធានសភាពាណិជ្ជកម្មខេត្ត លោក លោកស្រីជាសមាជិក សមាជិកាគណៈកម្មាធិការខេត្តជំរុញចលនាភូមិ១ផលិតផល១ តំណាងអាជីវករ ពាណិជ្ជករ សិប្បករ និងតំណាងសហគមន៍កសិកម្មក្នុងខេត្ត ៕ វ៉ៃកូ