ភ្នំពេញ៖ ព្រឹកថ្ងៃទី៣១ ខែសីហា ឆ្នាំ២០១៨នេះ រដ្ឋបាលរាជធានីភ្នំពេញ បានរៀបចំកិច្ចប្រជុំស្តីពី ការណែនាំ និងការលុបបំបាត់ការប្រើប្រាស់ ការជួញដូរ និងការចែកចាយគ្រឿងញៀន តាមបណ្តាលក្លឹបកម្សាន្ត និងអាជីវកម្មដ្ឋាន ក្នុងវិស័យទេសចរណ៍ នៅរាជធានីភ្នំពេញ។
ក្នុងឱកាសនោះដែរ លោក មាន ចាន់យ៉ាដា អភិបាលរងរាជធានីភ្នំពេញ បានមានប្រសាសន៍ថា បញ្ហាគ្រឿងញៀនអាចកាត់បន្ថយទៅបាន លុះត្រាតែមានការចូលរួម ពីគ្រប់ស្ថាប័នពាក់ព័ន្ធ ពិសេសបងប្អូនម្ចាស់អាជីវកម្មទេសចរណ៍ផ្ទាល់តែម្ដង។
លោកបានបន្ថែមថា អាជ្ញាធររាជធានីភ្នំពេញ បានអញ្ជើញម្ចាស់អាជីវកម្មទេសចរណ៍នានា ក្នុងរាជធានីភ្នំពេញ ចូលរួមប្រមាណជិត៥០០នាក់ មកប្រជុំនាពេលនេះ ដើម្បីណែនាំឱ្យមានការចូលរួម លុបបំបាត់ការប្រើប្រាស់ ការជួញដូរ និងការចែកចាយគ្រឿងញៀន នៅគ្រប់រូបភាព។
លោកបានបញ្ជាក់ថា “គ្រប់អាជីវកម្មដ្ឋានទាំងឡាយណា ដែលរកឃើញថា ជាកន្លែងប្រើប្រាស់ ឬចែកចាយគ្រឿងញៀន ដោយមិនបានរាយការណ៍ មកអាជ្ញាធរ នោះម្ចាស់អាជីវកម្ម នឹងមានទោសស្មើនឹងបទសហការ ហើយនឹងឈានដល់ ការបិទអាជីវកម្មតែម្ដង”៕ ដោយ៖កូឡាប
