ស្ត្រីវ័យក្មេងម្នាក់នៅក្នុងខេត្ត Chanthaburi ប្រទេសថៃ មិនជាយ៉ាងម៉េច ស្រាប់តែបានធ្លាក់ចុះពីលើស្ពានព្រោង ខណៈទឹកទន្លេកំពុងហូរយ៉ាងខ្លាំង ធ្វើឲ្យមនុស្សម្នានៅទីនោះ ស្លុតរន្ធត់ព្រួយបារម្ភគ្រប់ៗគ្នាតែម្តង ។ ភ្លាមៗនោះផងដែរ បុរសចិត្តធម៌ម្នាក់ដែលមានភាពរហ័សរហួន ក៏បានចេញទូកដេញតាម ដើម្បីជួយសង្គ្រោះនាងទាន់ពេលវេលា ខណៈនាងកំពុងតស៊ូនៅក្នុងទឹក ។
តាមរយៈវីដេអូឃ្លីប ដែលត្រូវបានថតដោយអ្នកដំណើរជិះម៉ូតូម្នាក់ បានបង្ហាញឲ្យឃើញស្ត្រីរងគ្រោះខាងលើ ត្រូវបានខ្សែទឹកហូរនាំទៅឆ្ងាយពីស្ពានយ៉ាងលឿន និងបន្ទាប់ភ្លាមៗនោះ ទូកមួយក៏ត្រូវបានឃើញបើកដេញតាម ដើម្បីជួយសង្គ្រោះនាង ។
បន្ទាប់ពីទូកនោះបានទៅដល់នាង បុរសជាអ្នកថត ក៏បានរ៉េកាមេរ៉ាចាកចេញពីស្ពាន ដើម្បីទៅរកកន្លែងថតម៉ូតូរបស់គាត់ និងបន្តរត់យ៉ាងត្រដាបត្រដួស ដើម្បីផ្តិតយកហេតុការណ៍នេះ ។
មនុស្សប្រុសស្រីមួយចំនួន ត្រូវបានឃើញចេញពីក្នុងហាងជាប់មាត់ទន្លេ ដើម្បីមកលើជាមួយភាពភ្ញាក់ផ្អើលគ្រប់ៗគ្នា ។
ទីបំផុត ស្ត្រីរងគ្រោះត្រូវបានបុរសម្នាក់នាំចេញពីក្នុងទឹកដោយសុវត្ថិភាព ខណៈវីរបុរសទូកដ៏ក្លាហានម្នាក់នោះ ក៏បានបញ្ឆេះម៉ាស៊ីនបើកទូកត្រឡប់ទៅទីតាំងរបស់គាត់វិញ ។
នៅពេលសួរនាំពីមូលហេតុ ថាតើនាងមានបំណងលោតទឹក ឬ ក៏ធ្លាក់ដោយចៃដន្យ ស្ត្រីរូបនេះពុំឆ្លើយតបនោះទេ និងគិតតែឈ្ងោកមុខយំប៉ុណ្ណោះឯង ។ ហើយបន្ទាប់ពីរឿងរ៉ាវនេះត្រូវបានបញ្ចេញ មានមនុស្សជាច្រើនបានមកលើកទឹកចិត្តនាងឲ្យក្រោកឈរ និងតាំងចិត្តតស៊ូនៅក្នុងជីវិតឡើងវិញ ទោះបីជានាងកំពុងជួបវិបត្តិណាមួយក៏ដោយចុះ ខណៈអ្នកផ្សេងទៀត បានទៅសួរសុខទុក្ខបុរសដ៏ក្លាហាន ដែលបានចេញទូកទៅជួយសង្គ្រោះនាង នៅក្នុងស្ថានភាពទឹកទន្លេដ៏ប្រឈមនឹងគ្រោះថ្នាក់នេះ ៕ ចន្ទី (khaosod)