មនុស្សចំនួន ២៣៥នាក់បានស្លាប់ និងយ៉ាងហោចណាស់ ១០០នាក់រងរបួស នៅក្នុងហេតុការណ៍បំផ្ទុះគ្រាប់បែក និងការបាញ់រះលើព្រវិហារអ៊ីស្លាមមួយកន្លែង ស្ថិតក្នុងខេត្តស៊ីណៃ ភាគខាងជើងប្រទេសអេហ្សីប។ នេះបើតាមការចេញផ្សាយរបស់សារព៌តមាន BBC។
ការវាយប្រហារដ៍ឃោរឃៅនៅថ្ងៃសុក្រនេះ កើតឡើងនៅព្រះវិហារ អាល់ រ៉ាវដា (Al-Rawda) ស្ថិតក្នុងទីក្រុង Bir al-Abed។
បើតាមសាក្សីដែលបានឃើញហេតុការណ៍ បានបញ្ជាក់ថា មានខ្មាន់កាំភ្លើងជាច្រើននាក់បានជិះរថយន្តមក និងបានបោកគ្រាប់បែកលើព្រះវិហារ មុនពេលពួកគេបានបាញ់រះលើអ្នកបួងសួងក្នុងព្រះវិហារ ខណៈពេលដែលអ្នកបួងសួងទាំងនោះព្យាយាមរត់គេច។
បើតាមសេចក្តីរាយការណ៍ក៍បានឲ្យដឹងផងដែរថា ពួកខ្មាន់កាំភ្លើងទាំងនោះបានដុតឡានដែលចតនៅបរិវេណព្រះវិហារដើម្បីបិទផ្លូវចូលទៅកាន់ព្រះវិហារ។
នេះគឺជាការវាយប្រហារដែលមានគ្រោះថ្នាក់ខ្លាំងបំផុតនៅក្នុងប្រវត្តសាស្ត្ររបស់ប្រទេសអេហ្សីបក្នុងសម័យនេះ។
រហូតមកដល់ពេលនេះ មិនទាន់មានក្រុមណាចេះមុខអះអាងពីទំនួសខុសត្រូវរបស់ពួកគេឡើយ ប៉ុន្តែជារឿយៗ ខេត្តស៊ីណៃទទួលរងការវាយប្រហារជាច្រើនលើកច្រើនសារពីសំណាក់ពួកសកម្មប្រយុទ្ធរបស់ក្រុមរដ្ឋអ៊ីស្លាម។
ប្រធានាធិបតីអេហ្សីប Abdul Fattah al-Sisi ប្តេជ្ញាថានឹងធ្វើការឆ្លើយតបវិញជាមួយក្រុមតិរិច្ឆានទាំងនោះ បន្ទាប់ពីពិភាក្សាជាមួយមន្ត្រីសន្តិសុខ៕ សុភ័ក្ត្រ