ភ្នំពេញ ៖ ក្រសួងសុខាភិបាល បានចេញសេចក្តីជូនដំណឹងស្តីពី វ៉ាក់សាំង Rabies Vaccine មានការវេចខ្ចប់ B/ 5 Vials doses + 5 Vials Solvant ផលិតដោយរោងចក្រឈ្មោះ Changchun Changsheng Life Sciences Ltd នៃប្រទេសចិន មានលក្ខណៈមិនត្រឹមត្រូវតាមស្តង់ដារ ដែលច្បាប់បានអនុញ្ញាត។
ក្រសួងសុខាភិបាល បានបញ្ជាក់ថា ផលិតផលនេះត្រូវបាននាំចូល និងចែកចាយក្នុងប្រទេសកម្ពុជាដោយក្រុមហ៊ុន K-MAN Co., Ltd។ ដូចនេះគ្រប់អ្នកប្រកបវិជ្ជាជីវៈសុខាភិបាលដែលមានវ៉ាក់សាំងនេះ ត្រូវបញ្ឈប់ការប្រើប្រាស់ជាបន្ទាន់ ហើយត្រូវទំនាក់ទំនងជាមួយក្រុមហ៊ុន ដើម្បីប្រគល់ផលិតផលនេះទៅវិញ (ក្រុមហ៊ុននឹងទូទាត់សំណងជូនវិញ)។
ឱសថការី ជូ យ៉ិនស៊ីម រដ្ឋលេខាធិការក្រសួងសុខាភិបាល បានថ្លែងថា ក្រសួងសុខាភិបាល នឹងមានវិធានការតឹងរ៉ឹងតាមផ្លូវច្បាប់ ចំពោះគ្រឹះស្ថានអាហរ័ណ នីហរ័ណឱសថ ឱសថស្ថាន ឱសថស្ថានរង ទាំងឡាយនាដែលនៅតែការតាំងលក់វ៉ាក់សាំងនេះ ។ គ្រប់មន្ទីរសុខាភិបាលរាជធានី ខេត្ត ត្រូវមានវិធានការធ្វើការណែនាំដល់គ្រប់សាខាគ្រឹះស្ថាន ក្នុងស្រុក ដែលធ្វើប្រតិបត្តិការនាំចូល ឬចែកចាយឱសថ ត្រូវប្រមូលមកវិញ នូវវ៉ាក់សាំងនេះពីគ្រឹះស្ថានលក់ឱសថនានា ក្នុងព្រះរាជាណាចក្រកម្ពុជា។ គ្រប់មន្ទីរពេទ្យរដ្ឋ ឯកជន គ្លីនិក បន្ទប់ពិគ្រោះជំងឺ បន្ទប់ព្យាបាលជំងឺ និងគ្រប់សេវាសុខាភិបាល ត្រូវបញ្ឈប់ការប្រើប្រាស់វ៉ាក់សាំងទាំងនេះ ៕ ដោយ៖កូឡាប