កាលពីអំឡុងពាក់កណ្តាលខែសីហា កន្លងទៅនេះ សមត្ថកិច្ចថៃបានស្នើសុំសហការជាមួយសមត្ថកិច្ចកម្ពុជា តាមចាប់ខ្លួនបងប្អូនប្រុសជនជាតិថៃ២នាក់ ដែលមានឈ្មោះថា Assaya Chaipha អាយុ ៣៣ ឆ្នាំ (បង) និង Anuwat Chaipha (ប្អូន) ក្នុងករណីចោទប្រកាន់ក្នុងអំពើឃាតកម្មទៅលើស្ត្រីអ្នកជំនួញថៃរូបស្រស់ម្នាក់ឈ្មោះ Thitima Tangwibulphanit អាយុ ៣៩ ឆ្នាំ ហើយបានរត់គេចខ្លួនមកសម្ងំលាក់ខ្លួននៅក្នុងប្រទេសកម្ពុជា ។
ទីបំផុត បងប្អូនប្រុសទាំងពីរដែលត្រូវបានចោទប្រកាន់នេះ ត្រូវបានចាប់ខ្លួននៅផ្ទះជួលភូមិបឹងប្រស្រែ ឃុំព្រៃញាតិ ស្រុកគងពិសី ខេត្តកំពង់ស្ពឺ កាលពីរសៀលថ្ងៃទី៣១ ខែសីហា ឆ្នាំ២០១៨ ក្រោមប្រតិបត្តិការរបស់កម្លាំងកងរាជអាវុធហត្ថលើផ្ទៃប្រទេស និងកម្លាំងអាវុធហត្ថខេត្តកំពង់ស្ពឺ ដែលបានសហការជាមួយប៉ូលីសអន្តរជាតិ (Interpool) របស់ថៃ ។ នេះយោងតាមសារព័ត៌មាន freshnewsasia ។
នៅល្ងាចថ្ងៃនោះផងដែរ សមត្ថកិច្ចកម្ពុជា ក៏បានប្រគល់ជនសង្ស័យជនជាតិថៃទាំងពីរនេះ ទៅឲ្យសមត្ថកិច្ចថៃ នាំយកទៅកាត់ទោសភ្លាមៗផងដែរ តាមរយៈឧទ្ធម្ភាគចក្ររបស់កម្ពុជា ។
ក្នុងប្រតិបត្តិការចាប់ខ្លួននេះផងដែរ សមត្ថកិច្ចចម្រុះបានរកឃើញម៉ូតូ ២ គ្រឿង និងទ្រព្យសម្បត្តិនៅជាប់ខ្លួនរបស់ពួកគេមួយចំនួនដូចជា៖ កាបូបម៉ាក Louis Vuitton, គ្រឿងអលង្ការ, នាឡិកាប្រណីតៗ, ATM និងកាតប័ណ្ណឥណទានដទៃទៀត ៕ ឧត្តម (khoasod)