រាជធានីភ្នំពេញ ៖ ធនាគារ ស្ថាបនា ប្រកាសបើកដំណើរការប្រើប្រាស់ជាផ្លូវការសេវា Sathapana Mobile ថ្មីរបស់ខ្លួនដែលជាកម្មវិធីធ្វើប្រតិបត្តិការធនាគារតាមទូរស័ព្ទដៃ។ Sathapana Mobile គឺជាផ្នែកមួយនៃការរីកចម្រើនលើប្រតិបត្តិការធនាគារតាមប្រព័ន្ធឌីជីថលរបស់ធនាគារ ស្ថាបនា។ ដែលប្រារព្ធឡើងនៅព្រឹក ថ្ងៃសៅរ៍ ទី១ ខែកញ្ញា ឆ្នាំ២០១៨ ក្នុងផ្សារទំនើបអ៊ីអនសែនសុខ នៅជាន់ផ្ទាល់ដី ផ្នែកខាងត្បូង។
ឥឡូវនេះ លោកអ្នកអាចទាញយកកម្មវិធី Sathapana Mobile ពី App Store និង Google Play ដើម្បីទទួលបានការធ្វើប្រតិបត្តិការធនាគារ តាមទូរស័ព្ទដៃប្រកបដោយសុវត្ថិភាព ឆាប់រហ័ស និងភាពងាយស្រួល ព្រមទាំងមានមុខងារជាច្រើន មានដូចជា ពិនិត្យមើលសមតុល្យគណនី ធ្វើប្រតិបត្តិការផ្សេងៗ បើកគណនីប្រាក់បញ្ញើមានកាលកំណត់ផ្ទេរប្រាក់ ទូទាត់វិកយបត្រ បញ្ចូលទឹកប្រាក់ទៅកាន់លេខទូរស័ព្ទ និងមានមុខងារពិសេសៗជាច្រើនទៀត ដែលលោកអ្នកអាចធ្វើប្រតិបត្តិការ បានគ្រប់ពេលវេលា និងគ្រប់ទីកន្លែងនៅលើពិភពលោក។
លោក Norihiko KATO ប្រធាននាយកប្រតិបត្តិធនាគារ ស្ថាបនា បានមានប្រសាសន៍ថា “យើងមានមោទនភាពក្នុងការប្រកាស បើកដំណើរការប្រើប្រាស់ កម្មវិធីសម្រាប់ធ្វើប្រតិបត្តិការ ធនាគារតាមទូរស័ព្ទដៃនេះ ដែលនឹងផ្តល់ជូនអតិថិជនរបស់យើង នូវបទ ពិសោធន៍ថ្មី ប្រកបដោយសុវត្ថិភាពខ្ពស់ និងទទួលបានការប្រើប្រាស់សេវាធនាគារ ដែលមានគុណតម្លៃ និងភាពរីករាយបន្ថែម ទៀត។”
លោក Norihiko KATO បានមានប្រសាសន៍បន្ថែមទៀតថា “Sathapana Mobile គឺជាគំនិតផ្តួចផ្តើមដ៏សំខាន់មួយរបស់ធនាគារនៅឆ្នាំនេះ ដែលបង្ហាញពីការប្តេជ្ញាចិត្តរបស់យើង ដើម្បីបំពេញនូវតម្រូវការហិរញ្ញវត្ថុទំនើបរបស់អតិថិជន។ Sathapana Mobile ក៏នឹងជួយជំរុញបន្ថែមទៀត ដល់ការរីកចម្រើន នៃការធ្វើប្រតិបត្តិការធនាគារ តាមទូរស័ព្ទដៃនៅកម្ពុជាផងដែរ។”
លក្ខណៈពិសេសៗរបស់ Sathapana Mobile រួមមាន៖
១.ពិនិត្យមើលសមតុល្យ និងប្រតិបត្តិការគណនី ៖ របាយការណ៍សង្ខេបអំពីគណនី ពិនិត្យនិងទាញយកប្រតិបត្តិការក្នុងកំឡុងពេល ១៨០ ថ្ងៃចុងក្រោយពីគណនីសន្សំ ឬគណនីចរន្តរបស់លោកអ្នក។
២.បើកគណនីមានកាលកំណត់ ៖ បង្កើត និងគ្រប់គ្រងគណនីមានកាលកំណត់។
៣.ផ្ទេរប្រាក់ ៖ ធ្វើការផ្ទេរប្រាក់នៅក្នុងស្រុកនិងក្រៅស្រុក ផ្ទេរប្រាក់រវាងគណនីផ្ទាល់ខ្លួន ផ្ទេរប្រាក់ទៅគណនីផ្សេងទៀត ឬផ្ទេរប្រាក់ទៅគណនីក្នុងសមាជិក Fast ផ្ទេរប្រាក់ទៅកាន់ដៃគូរ ផ្តល់សេវាកម្មទូទាត់ (PSP)។
៤.ធ្វើប្រតិបត្តិការលើប័ណ្ណឥណទាន ៖ ពិនិត្យមើលសមតុល្យ និងប្រតិបតិ្តការប័ណ្ណឥណទាន ទូទាត់វិក្កយបត្រប័ណ្ណឥណទាន ឬ បង្ខាំងប័ណ្ណរបស់លោកអ្នក។
៥.ការទូទាត់វិក្កយបត្រ ៖ ការទូទាត់វិក្កយបត្រទៅក្រុមហ៊ុនដែលជាដៃគូរសហការណ៍។ ៦)បញ្ចូលកាតទូរស័ព្ទ ៖ បញ្ចូលទឹកប្រាក់ភ្លាមៗទៅកាន់លេខទូរស័ព្ទរបស់លោកអ្នក។
៧.ប្រើស្នាមម្រាមដៃសម្រាប់ចូលប្រើប្រាស់ ៖ ប្រើស្នាមម្រាមដៃដើម្បីចូលប្រើប្រាស់ Sathapana Mobile នៅលើកម្មវីធី iOS ឬ Android បានយ៉ាងឆាប់រហ័ស។
សូមបញ្ជាក់ថា ធនាគារ ស្ថាបនា គឺជាធនាគារពាណិជ្ជឈានមុខគេមួយនៅក្នុងប្រទេសកម្ពុជាដែលមានទ្រព្យសកម្មសរុបជាង១ពាន់លានដុល្លារអាមេរិក។ ធនាគារ ស្ថាបនា មានបណ្តាញសាខាធំជាងគេលំដាប់ទីពីរ នៅក្នុងប្រទេសដែលមានបណ្តាញសាខាចំនួន ១៦៩ និងបុគ្គលិកបម្រើការងារជាង៤០០០នាក់។ ធនាគារផ្តល់ជូននូវផលិតផល និងសេវាកម្មធនាគារពេញលេញមានដូចជា ផលិតផលប្រាក់កម្ចី ប្រាក់បញ្ញើ សេវា Sathapana Mobile សេវា iBanking សេវាផ្ទេរប្រាក់ក្នុងប្រទេសនិងក្រៅប្រទេស សេវាធានា និងសេវាទូទាត់ការនាំចេញនិងនាំចូល និងមានសេវាធនាគារជាច្រើនផ្សេងទៀត។
សម្រាប់ព័ត៌មានបន្ថែម សូមចូលទៅកាន់គេហទំព័ររបស់យើងខ្ញុំ www.sathapana.com.kh ៕ ដោយ ៖ កូឡាប