ហេតុការណ៍ដ៏សាហាវមួយ ដែលបានកើតឡើងនៅលើដងផ្លូវមួយកន្លែង នៅក្នុងទីក្រុង Kunshan ខេត្ត Jiangsu បានក្លាយជារឿងរ៉ាវដ៏ធំបំផុតមួយ នៅលើប្រព័ន្ធផ្សាយសង្គមរបស់ចិន នៅសប្តាហ៍នេះ បន្ទាប់ពីអ្នកបើកបរបង្កដែលលេងសាក់ពេញខ្លួន ត្រូវជនរងគ្រោះតបតចាក់ឲ្យស្លាប់នៅនឹងកន្លែងដោយកាំបិតរបស់គាត់វិញ ។
ហេតុការណ៍ដ៏រន្ធត់នេះ បានកើតឡើងនៅផ្លូវប្រសព្វមួយ នាវេលាម៉ោងប្រហែល ៩ និង ៣៧ យប់ថ្ងៃចន្ទ ។ វីដេអូពីកាមេរ៉ាឃ្លាំមើល បានបង្ហាញបុរសអ្នកបើកបររថយន្ត BMW បានព្យាយាមបើកចូលផ្លូវកង់ ដើម្បីទៅគៀកភ្លើងសញ្ញាចរាចរណ៍ក្រហម ដោយបានបុកទង្គិចនឹងអ្នកជិះកង់ម្នាក់ ដែលគាត់ពុំព្រមបើកផ្លូវឲ្យ ។
ភ្លាមៗនោះ អ្នកដំណើរ២នាក់ (ម្នាក់ប្រុស និងម្នាក់ទៀតជាស្ត្រី) បានចុះចេញពីរថយន្ត និងចូលទៅសម្របសម្រួលអ្នកជិះកង់ម្នាក់ឈ្មោះ Yu អាយុ ៤១ ឆ្នាំ ។ នៅពេលនោះ ស្ត្រីម្នាក់បានជួយនាំយកកង់របស់គាត់ទៅលើចិញ្ចើមផ្លូវ និងបន្ទាប់ចរចាគ្នាមួយសន្ទុះ អ្នកទាំងពីរក៏បានវិលត្រឡប់មករថយន្តវិញ ។
ទោះយ៉ាងណា បន្ទាប់ពីនោះ អ្នកបើកបរចិត្តខ្លាំងខ្លួនពោរពេញដោយសាក់ ឈ្មោះ Liu អាយុ ៣៦ ឆ្នាំ បានចុះពីរថយន្តម្តងវិញ និងដើរសំដៅកាន់ Yu ។ ហើយទោះបីអ្នកដំណើរប្រុសម្នាក់ បានព្យាយាមទាញគាត់វិលត្រឡប់មកវិញយ៉ាងណាក៏ដោយ ក៏ Liu បន្តព្យាយាមវាយប្រហារ Yu ។ ទីបំផុត Liu បានវិលមករថយន្តរបស់គាត់ និងរត់ត្រឡប់ទៅវិញយ៉ាងលឿន ជាមួយកាំបិតដ៏មុតស្រួច ចាក់ប្រហារមកលើ Yu សាហាវតែម្តង ។
ប៉ុន្តែ នៅចំណុចមួយនោះ Liu ស្រាប់តែរបូតកាំបិតខ្ទាចទៅលើថ្នល់ ជាឱកាសធ្វើឲ្យ Yu ស្ទុះទៅគ្រប់គ្រងចាប់ច្បាមកាំបិត និងចាក់ Liu ១កាំបិតឲ្យដេកទៅនឹងដីមួយរំពេច ។ ខណៈ Liu ព្យាយាមក្រោកឡើង Yu ក៏បានបន្តចាក់ និងធ្វើឲ្យអ្នកបើកបរបង្ករូបនេះរត់ចេញទាំងឈឺចុកចាប់បំផុត ក្នុងបំណងចូលរថយន្ត ប៉ុន្តែ ត្រូវ Yu ពុំទុកឱកាសឲ្យ និងបន្តដេញតាមចាក់រហូតស្លាប់តែម្តង ។
Yu ត្រូវបានប៉ូលីសចាប់ឃុំខ្លួនបណ្តោះអាសន្ន ដើម្បីរង់ចាំការស៊ើបអង្កេតករណីនេះជាក្រោយ ៕ ឧត្តម (shanghaiist)
