ទោះបីជាពុំទាន់មានលទ្ធផលស៊ើបអង្កេតចោទប្រកាន់ថាបុរស២នាក់នោះ បានចាប់ជំរិតក្មេងក្តី តែហ្វូងមនុស្សដែលកំពុងផ្ទុះកំហឹងបានធ្វើការវាយដំ និងដុតសម្លាប់ទាំងរស់ ។
ហ្វូងមនុស្សកុះករ ចោមរោមក្នុងស្នងការដ្ឋានប៉ូលិស ដែលឃុំខ្លួនជនសង្ស័យចាប់ជំរិតក្មេងកាលពីថ្ងៃទី ២៩ ខែសីហា ។
តាម Reuters ហ្វូងមនុស្សដែលផ្ទុកពេញដោយកំហឹង នៅប្រជុំជន Vicente Proquron រដ្ឋ Puebla តំបន់ភាគកណ្តាល Mexico នៅថ្ងៃទី ២៩ ខែសីហា កន្លងមកនេះ បានដុតសម្លាប់បុរស២នាក់ ទាំងរស់ ព្រោះពួកគេជឿថា វាបានចាប់ជំរិតក្មេងៗ ។
ជនសង្ស័យ ២រូប ម្នាក់ ២១ឆ្នាំ និង ៥៣ឆ្នាំ ត្រូវបានឃុំខ្លួននៅស្នងការប៉ូលិសក្រោយការចោទប្រកាន់ តែហ្វូងមនុស្សកុះករបានអូសទាញពួកគេយកចេញពីកន្លែងឃុំខ្លួន វាយដំ ហើយដុតសម្លាប់តែម្តង ។ សមត្ថកិច្ចមូលដ្ឋានឲ្យដឹងថា មានមនុស្សប្រមាណ ១៥០នាក់ បានសម្រុកចូលវាយបំបែកទ្វារ រួចអូសអ្នកទាំងនោះចេញមកវាយដំ រួចចាក់សាំងដុតតែម្តង ។
ការិយាល័យអយ្យការរដ្ឋ សង្កត់ធ្ងន់ថា អ្នកទាំង២នោះ ពុំទាន់សារភាពពីកំហុសអ្វីទាំងអស់ ហេតុនេះគេនឹងធ្វើការស៊ើបអង្កេតករណីវាយដំ និតដុតសម្លាប់នុស្សនេះ ! ។ ចំណែកសាច់ញាតិរបស់អ្នកទាំង២នោះ និយាយថា ពួកគេជាកសិករ មកពីទីប្រជុំជនដើម្បីទិញសម្ភារៈ ។
ស្ថានភាពឧក្រិដ្ឋកម្មលើរឿងពុំឈប់ឈរ គួបផ្សំនឹងការអស់សង្ឃឹមជាមួយកងកម្លាំងប៉ូលិស Mexico គឺជាមូលហេតុ នាំឲ្យមានព្រឹត្តិការណ៍ “កាត់ទោសផ្ទាល់” ដូចមានករណីនេះជាឧហរណ៍ស្រាប់ ៕ ចន្ទ្រា
