ខេត្តព្រះសីហនុ ៖ កម្លាំងកងរាជអាវុធហត្ថខេត្តព្រះសីហនុ បំពាក់អាវុធវែងខ្លីជានាក់ បានឆ្មក់ចូលក្នុងក្លឹបកំសាន្ត របស់ជនជាតិចិន១កន្លែង មានទីតាំងនៅតាមផ្លូវឯករាជ្យ ជិតរង្វង់មូលតោពីរ កណ្តាលទីក្រុងព្រះសីហនុ ដែលសង្ស័យមានការជួញដូរ និងប្រើប្រាស់គ្រឿងញៀន។
យុទ្ធនាការនេះ ចាប់ផ្តើមនៅម៉ោងជាង ១២យប់ រំលងអធ្រាត្រឆ្លងចូល ថ្ងៃទី២ ខែកញ្ញា ឆ្នាំ២០១៨ ដោយមានការសម្របសម្រួលផ្លូវច្បាប់ដោយ លោក កៀង សុន្ទរោ ព្រះរាជអាជ្ញាររងអមសាលាដំបូង ខេត្តព្រះសីហនុ។
មន្ត្រីកងរាជអាវុធហត្ថបានឲ្យដឹងថា កម្លាំងកងរាជអាវុធហត្ថក្រុងព្រះសីហនុ និងកម្លាំងអាវុធហត្ថខេត្ត បានសហការចុះបង្ក្រាបបទល្មើសគ្រឿងញៀន នៅចំណុចក្លឹបកំសាន្ត អ៊ីតៃជាយិន មានទីតាំងនៅជិតមន្ទីរពេទ្យបង្អែកខេត្តព្រះសីហនុ តាមបណ្តោយផ្លូវឯករាជ្យ ឆ្លូវឆ្ពោះទៅរង្វង់មូលតោពីរ ក្នុងសង្កាត់លេខ៤ ក្រុងព្រះសីហនុ។
យុទ្ធនាការខាងលើនេះ កម្លាំងកងរាជអាវុធហត្ថ បានឃាត់ខ្លួនជនជាតិចិនចំនួន ១១នាក់ ស្រី៦នាក់ ដោយដកហូតបានគ្រឿងញៀនមួយចំនួន។
មន្ត្រីកងរាជអាវុធហត្ថខេត្តព្រះសីហនុ បញ្ជាក់ថា ជនសង្ស័យលើបទល្មើសគ្រឿងញៀនខាងលើនេះ មន្ត្រីជំនាញបាននាំយកទៅសាកសួរ ដើម្បីឈានទៅរៀបចំសំណុំរឿង បញ្ជូនជនសង្ស័យ ទៅកាន់សាលាដំបូងខេត្តព្រះសីហនុ បន្តនីតិវិធីតាមផ្លូវច្បាប់៕ ដោយ៖ ដែន សីមា