នេះគឺជាខណៈពេលដ៏គួរឲ្យរន្ធត់មួយ ដែលស្ត្រីជាបុគ្គលិកការិយាល័យម្នាក់ នៅក្នុងទីក្រុង Pattaya ប្រទេសថៃ ត្រូវបានវាយប្រហារយ៉ាងសាហាវនៅលើដងផ្លូវ ពីសំណាក់ស្ត្រីម្នាក់ទៀត ដែលកំពុងដើរបញ្ច្រាសទិសគ្នា ។
ស្ត្រីរងគ្រោះដែលសុំមិនបញ្ចេញឈ្មោះ បានរៀបរាប់ឲ្យដឹងថា ខណៈពេលនាងដើរនៅលើចិញ្ចើមផ្លូវ និងកំពុងចុចទូរស័ព្ទហៅមិត្តភក្តិរបស់នាង ដើម្បីទៅទិញបាយហូប ក្នុងអំឡុងពេលសម្រាកការងារថ្ងៃត្រង់ នៅពេលនោះ នាងក៏ស្រាប់តែត្រូវបានវាយប្រហារពីសំណាក់ស្ត្រីម្នាក់ នៅពាក់កណ្តាលផ្លូវតែម្តង ។
នាងបន្តថា៖ «ខ្ញុំពុំនឹកស្មានដល់ថា កើតមានរឿងរ៉ាវបែបនេះសោះឡើយ ។ បន្ទាប់ពីស្ត្រីនោះបានវាយមុខខ្ញុំមួយដៃយ៉ាងធ្ងន់ ខ្ញុំក៏បានសួរទៅនាងភ្លាមៗថា ហេតុអ្វីបានជានាងវាយខ្ញុំបែបនេះ? ហើយស្ត្រីនោះបានឆ្លើយតបថា ខ្ញុំជាសត្រូវរបស់នាង ។ ខ្ញុំពិតជាស្រឡាំងកាំងនៅពេលនាងនិយាយបែបនេះ ព្រោះខ្ញុំពុំដែលស្គាល់នាងសោះ! ខ្ញុំគិតថា ស្ត្រីនោះជាមនុស្សឆ្កួតតែម្តង» ។
«ដោយសារតែខ្លាចស្ត្រីនោះមានអាវុធ ខ្ញុំក៏បានស្រែកឲ្យគេជួយ និងសំណាងណាស់ ដែលបានបុរសជិះកង់ម្នាក់ និងបុរសម្នាក់ទៀត បានចូលមកជួយបំបែកស្ត្រីនោះចេញពីខ្ញុំ ខណៈនាងកំពុងបានចាប់បោចសក់ខ្ញុំយ៉ាងសាហាវ» ។
តាមរយៈវីដេអូពីកាមេរ៉ាសន្តិសុខដងផ្លូវ បានបង្ហាញឲ្យឃើញស្ត្រីស្ថិតក្នុងសម្លៀកបំពាក់ធ្វើការម្នាក់ បានដើរនៅលើចិញ្ចើម និងភ្លាមៗនោះ នាងស្រាប់តែត្រូវបានស្ត្រីម្នាក់ដាល់មួយចំក្បាលយ៉ាងពេញទំហឹង ខណៈពួកគេបានឆ្លងកាត់គ្នា ។ នៅពេលនាងសួរនាំអំពីហេតុការណ៍នេះ ស្រាប់តែស្ត្រីទំនងជាឆ្កួតនោះ ស្ទុះចាប់បោចសក់នាងយ៉ាងសាហាវតែម្តង… ។
យោងតាមប្រភពព័ត៌មានបានឲ្យដឹងថា ស្ត្រីដៃដល់នោះ ត្រូវបានប៉ូលីសចាប់ខ្លួនដាក់ពន្ធនាគារ ខណៈស្ត្រីរងគ្រោះត្រូវបានបញ្ជូនទៅកាន់មន្ទីរពេទ្យ ទីកន្លែងដែលនាងត្រូវបានអនុញ្ញាតឲ្យវិលត្រឡប់មកផ្ទះវិញ បន្ទាប់ពីព្យាបាលរបួសស្រាល ។
ប៉ូលីសនិយាយថា ខណៈពេលចាប់ខ្លួន ពួកគេបានឆែកឆេរកាបូបរបស់ស្ត្រីវ័យក្មេងនេះ ពុំឃើញមានលុយ, ថ្នាំញៀន និងសូម្បីទូរស័ព្ទនោះទេ ប៉ុន្តែ មានតែអត្តសញ្ញាណប័ណ្ណ១សន្លឹកប៉ុណ្ណោះ ៕ ឧត្តម