ខេត្តព្រះសីហនុ ៖ អគ្គនាយកសាលាអាយដៀស៊ស ខេត្តព្រះសីហនុ ប្រកាសទទួលអប់រំកុមារតូចៗ ចាប់ពីថ្នាក់មតេយ្យ រហូតដល់ថ្នាក់វិទ្យាល័យ ដោយមានកម្មវិធីអប់រំ មានលក្ខណៈស្តង់ដាជាតិ និងអន្តរជាតិ ជាពិសេសមានកម្មវិធីសិក្សា ៣ភាសា ប្រកបដោយគុណភាព។
ផ្តើមពីបញ្ហានេះ លោកឧកញ៉ា វណ្ណ សុខហេង អគ្គនាយកសាស្តង់ដាជាតិ និងអន្តរជាតិ អាយដៀស៊ស ខេត្តព្រះសីហនុ មានប្រសាសន៍ថា ស្របពេលរាជរដ្ឋាភិបាលកំពុងតែយកចិត្តទុកដាក់ធ្វើកំណែទម្រង់គុណភាពអប់រំ រូបលោកសូមចូលខ្លួន មកចែករំលែកនូវបទពិសោធន៍ការងារអប់រំមួយចំនួន ដើម្បីជាទុនសម្រាប់វិនិយោគលើកុលបុត្រកុលធីតា របស់លិកអ្នក ឲ្យទទួលបានជោគជ័យនាថ្ងៃអនាគតនោះ គឺគុណភាពនៃការអប់រំប្រកបដោយប្រសិទ្ធភាព។
ត្រង់ចំណុចនេះ លោកអគ្គនាយកសង្កត់ធ្ងន់ថា គុណភាពអប់រំ ត្រូវពឹងផ្អែកទៅលើភាគីពាក់ព័ន្ធជាច្រើនដូចជា៖ កត្តាសាលារៀន នាយកសាលា លោកគ្រូអ្នកគ្រូ សម្ភារៈរូបវន្ត និងកម្មវិធីសិក្សា ប្រកបដោយគុណភាព ប្រសិទ្ធភាព និងភាពទាន់សម័យ ជាពិសេសដូចបណ្តាប្រទេសមួយចំនួនលើសកលលោក។
ជាងនេះទៀត ក៏ត្រូវបូកបញ្ជូលទាំងនាយកសាលា គ្រូបង្រៀន ប្រកបដោយព្រហ្មវិហារធម៌ គរុកោសល្យ បច្ចេកទេស និងបទពិសោធន៍ក្នុងការបង្រៀន ប្រកបដោតចំណេះដឹងពិតប្រាកដ។ ដូច្នេះសាលា រួមទាំងមាតាបិតា សិស្សត្រូវមានតួនាទីយ៉ាងសំខាន់ ក្នុងការបង្រៀន និងបញ្ជូនកូនមកសាលាឲ្យទាន់ពេលវេលា ជួយជម្រុញឲ្យកូនៗធ្វើកិច្ចការផ្ទះឲ្យបានជាប្រចាំ និងតាមដានសិក្សា របស់កូនៗ ជារៀងរាល់ថ្ងៃផងដែរ។
លោកឧកញ៉ា វណ្ណ សុខហេង បញ្ជាក់ថា ចក្ចុវិស័យ របស់សាលាអាយដៀស៊សខេត្តព្រះសីហនុ គឺមានគោលបំណងអប់រំឲ្យកុមារមានចំណេះដឹង មានបំណិនជីវិត និងមានឥរិយាបទរស់នៅល្អ ចេះរួមរស់ក្នុងសង្គម ហើយប្រែក្លាយជាមនុស្សមានប្រយោជន៍ សម្រាប់សង្គមជាតិ និងសកលលោកទាំងមូល។
លោកឧកញ៉ា វណ្ណ សុខហេង ឲ្យដឹងដូច្នេះ ធ្វើឡើងនាឱកាសអបអរសាទរ ពិធីប្រគល់វិញ្ញាបនបត្រ លិខិតសរសើរ និងផ្តល់រង្វាន់លើកទឹកចិត្តដល់សិស្សានុសិស្សគ្រប់ភូមិសិក្សា នៃសាលាអាយសៀស៊ស ឆ្នាំសិក្សា២០១៧-២០១៨ កាលពីព្រឹកថ្ងៃទីសៅរ៍ទី១ ខែកញ្ញា ឆ្នាំ២០១៨។
នាឱកាសនោះដែរ អភិបាលរងខេត្តព្រះសីហនុ លោកស្រី ហៀក ហ៊ីមុល្លី មានប្រសាសន៍ថា គុណភាពអប់រំ គឺជាពន្លឺដ៏ត្រចេះត្រចង់ របស់កុមារា កុមារី និងសិស្សានុសិស្សគ្រប់ៗរូប។ ដូច្នេះលោកស្រីសូមចូលរួមគាំទ្រចំពោះសកម្មភាព របស់លោកឧកញ៉ា វណ្ណ សុខហេង និងគណៈគ្រប់គ្រង នៃសាលាអាយសៀស៊ស ដែលបានយកចិត្តទុកដាក់ចំពោះជោគវាសនាអនាគត កុលបុត្រកុលធីតាខ្មែរ នៅខេត្តព្រះសីហនុ ដោយការទទួលខុសត្រូវខ្ពស់។
ត្រង់ចំណុចនេះ លោកស្រី ហៀក ហ៊ីមុល្លី បានថ្លែងអំណរគុណថ្នាក់ដឹកនាំសាលាអាយដៀស៊ស និងសហការី ដែលបានយកចិត្តទុកដាក់ ខ្នះខ្នែង ពង្រីកវិសាលភាពគុណភាពអប់រំ ដើម្បីបំពេញតម្រូវការដល់កុលបុត្រកុលធីតាខ្មែរនៅខេត្តព្រះសីហនុទាំងមូល ឲ្យបានល្អប្រសើរ និងទាន់ពេលវេលា។
សាលាអាយដៀស៊សខេត្តព្រះសីហនុ ទទួលបានប្រកាសពីក្រសួងអប់រំលេខ២៣៦៥ ចុះថ្ងៃទី៣១ ខែឧសភា ឆ្នាំ២០១៣ ដែលមានទីតាំងស្ថិតនៅក្រុម១១ ភូមិ៣ សង្កាត់៤ ក្រុង-ខេត្តព្រះសីហនុ។
ទាក់ទិនការងារអប់រំនេះ លោកឧកញ៉ា វណ្ណ សុខហេង អគ្គនាយកសាលាអាយដៀស៊ស ស្តង់ដាជាតិ និងអន្តរជាតិ ឲ្យដឹងថា សាលាអាយដៀស៊ស មានចក្ខុវិស័យ និងបេសកកម្មច្បាស់លាស់ សំដៅពង្រីកលើវិន័យ ក្រមសីលធម៌ សេវាកម្មល្អ អនាម័យបរិស្ថាន សុវត្ថិភាព និងធានាការអប់រំប្រកបដោយគុណភាព។
លោកឧកញ៉ា វណ្ណ សុខហេង ឲ្យដឹងដូច្នេះ រួចបញ្ជាក់ថា កម្មវិធីសិក្សានៅសាលាអាយដៀស៊ស បានអនុវត្តស្របតាមតម្រូវការ ស្ថានភាពសង្គម និងបរិបទប្រទេសកម្ពុជា ដោយជាបន្តបន្ទាប់មកនេះ សាលាអាយដៀស៊សខេត្តព្រះសីហនុ បានបន្តអភិវឌ្ឍរៀបចំស្តង់ដាអប់រំលើបីភាសា គឺភាសាខ្មែរ ភាសាអង់គ្លេស និងភាសាចិន រួមទាំងបង្រៀនជំនាញវិទ្យាសាស្ត្រព័ត៌មានវិទ្យាដ៏ទំនើបថែមទៀតផង។
និយាយដល់ចំណុចនេះ លោកឧកញ៉ា វណ្ណ សុខហេង សង្កត់ធ្ងន់ថា រាល់ថ្ងៃនេះសាលាអាយដៀស៊ស មានគ្រូបង្រៀនជនជាតិខ្មែរ និងជនបរទេស សុទ្ធតែមានសញ្ញាបត្រគរុកោសល្យ សមត្ថភាព និងបទពិសោធន៍យូរឆ្នាំ ក្នុងវិស័យសិក្សាធិការអប់រំ។
ទន្ទឹមគ្នានេះ សាលាក៏បានអនុវត្តកម្មវិធីសិក្សាស្របតាមក្រសួងអប់រំ យុវជន និងកីឡា ដោយផ្សាភ្ជាប់ នឹងជីវភាពរស់នៅប្រចាំថ្ងៃ របស់ប្រជាពលរដ្ឋ និងប្រទេសជាតិ។
បន្ថែមលើសពីនេះ បច្ចុប្បន្ន សាលាអាយដៀស៊សខេត្តព្រះសីហនុ កំពុងអភិវឌ្ឍអគារសិក្សាមានលក្ខណៈស្តង់ដា ដែលមានបន្ទប់សិក្សាធំទូលាយ ដោយគ្រប់បន្ទប់សិក្សាទាំងអស់សុទ្ធតែស្របតាមនិយាមគរុកោសល្យត្រឹមត្រូវ។
ជាងនេះទៀត សាលាអាយដៀស៊សខេត្តព្រះសីហនុ អាចដោះស្រាយនូវកង្វល់បានទាន់ពេលវេលា អំពីការបញ្ជូនកូនចៅ របស់អាណាព្យាបាលនៅខេត្តព្រះសីហនុ ឲ្យទទួលបានការអប់រំនៅសាលាល្អៗ ដោយគ្រាន់តែបញ្ជូនកូនចៅ មកសាលាអាយដៀស៊សជាការស្រេច និងអស់កង្វល់ ព្រោះនឹងទទួលបាននូវចំណេះដឹងពិតប្រាកដ ប្រកបដោយគុណភាព៕ ដោយ៖ ដែន សីមា