ភ្នំពេញ ៖ លោកមាន ចាន់យ៉ាដា អភិបាលរងរាជធានីភ្នំពេញបានលើកឡើងថា ៖ រយៈពេល២ខែចុងក្រោយនេះ ការអនុវត្តផែនការរៀបចំសណ្តាប់ធ្នាប់តាមដងផ្លូវអាទិភាពទាំង១១ខ្សែ ដែលរដ្ឋបាលរាជធានីភ្នំពេញបានដាក់ចេញមកនោះ កំពុងកើតជំងឺលាប់ឡើងវិញ ក្រោយពីបានធ្វើសកម្មភាពតែមួយរយៈពេលរបស់អាជ្ញាធរខណ្ឌ សង្កាត់ និងសមត្ថកិច្ច ពាក់ពន្ធ័។
ក្នុងកិច្ចប្រជុំពិភាក្សាស្ដីពីការងារពង្រឹងសុវត្ថិភាពចរាចរក្នុងរាជធានីភ្នំពេញនារសៀលថ្ងៃទី២៤វិច្ឆិកា លោកមានចាន់ យ៉ាដា លើកឡើងថា៖កាលណាយើងរៀប សណ្តាប់ធ្នាប់តាមដងផ្លូវបានល្អ បរិស្ថានក៏ត្រូវបានលើកកំពស់ ការកកស្ទះចរាចរក៏ត្រូវបានកាត់បន្ថយ។លោកក៏បានកោតសរសើរដល់អាជ្ញាធរខណ្ឌខ្លះដែលបានយកចិត្តទុកដាក់រៀបចំសណ្តាប់ធ្នាប់តាមដងផ្លូវជាប្រចាំ។តែក៏មានខណ្ឌខ្លះនៅមិនបានអនុវត្តបានល្អតាមការណែនាំរបស់រដ្ឋបាលរាជធានីភ្នំពេញ ជាពិសេសខណ្ឌ៤នៅកណ្តាលក្រុងសមាជិកអង្គប្រជុំបានឯកភាពឲ្យមានការពង្រឹងវិធានការផ្លូវច្បាប់តឹងរឹង ពិសេសលើការផាកពិន័យរាល់ការមិនគោរពច្បាប់ ឬសេចក្តីណែនាំ សេចក្តីជូនដំណឹងលើបញ្ហាសណ្តាប់ធ្នាប់ និងចរាចរនេះក្នុងពេលដែលរាជធានីភ្នំពេញកាន់តែមានភាពស្មុកស្មាញ និងកកស្ទះចរាចរកំពុងកើតមានឡើងនាពេលបច្ចុប្បន្ន ហើយការផាកពិន័យក៏ត្រូវអនុវត្តឡើងវិញចាប់ពីការលក់ដូរ,ហាលខោអាវ,ការបោះសំរាមចោលផ្តេសផ្តាស់ ក៏ដូចការដឹកសត្វឆ្កែឲ្យទៅជុះលើសួនច្បារជាដើម។
លោកអភិបាលរងក្រុង មានប្រសាសន៍ថា៖បញ្ហាឡានធំចូលក្រុង នៅតែជារឿងឆ្លើយដាក់គ្នា។តែសូមបញ្ជាក់ថា៖ការចេញប័ណ្ណសម្រាប់រថយន្តធំចូលក្រុងគឺធ្វើនៅរដ្ឋបាលរាជធានីភ្នំពេញ។តែទោះបីយ៉ាងណាអាជ្ញាធរពាក់ព័ន្ធ ខណ្ឌ សង្កាត់ និងសមត្ថកិច្ចជំនាញត្រូវមានកិច្ចសហការអនុវត្តទប់ស្កាត់ឲ្យមានប្រសិទ្ធភាពដោយពិនិត្យទៅលើប្រភេទរថយន្ត,តម្រាយផ្លូវត្រូវចូល និងម៉ោងពេលចូលក្រុង។រថយន្តធុនធំទាំងនោះ បើទប់ពីខណ្ឌជាយក្រុងក៏វាមិនអាចចូលមកដល់កណ្តាលក្រុងបានដែរ ព្រោះវាមិនអាចហោះចូលបានទេ។ចំពោះរទេះធ្យូង រទេះដឹកឆ្នាំងដីលក់គឺលែងឲ្យចូលក្នុងក្រុងហើយ បើចូលតាមច្រកណាច្រកនោះទទួលខុសត្រូវ។
ការរិតបណ្តឹងការអនុវត្តច្បាប់ គឺអាចផ្លាស់ប្តូរទម្លាប់មនុស្សមួយចំនួនឲ្យងាកមកគោរពច្បាប់វិញ។ក្នុងកិច្ចប្រជុំនេះដែរ ក៏បានបង្ហាញឲ្យឃើញនូវទីតាំងដែលពុំទាន់មានសណ្តាប់ធ្នាប់ត្រឹមត្រូវចំនួន២២៥ចំណុចដែលមានភាពស្មុកស្មាញត្រូវតែមានវិធានការទប់ស្កាត់ដើម្បីសណ្តាប់ធ្នាប់ និងសោភ័ណភាពទីក្រុង ក៏ដូចលើកកម្ពស់ស្ថានភាពចរាចរផងដ៕ ដោយ៖កូឡាប
