ក្មេងស្រីម្នាក់នៅអាមេរិក ពេលដើរលេងតាមឆ្នេរសមុទ្រ នាងប្រទះឃើញដុំថ្មចម្លែក ច្បាមជាប់ដោយសារាយសមុទ្រ ។ នាងក៏កាន់វាយកមកផ្ទះ ។ គ្រាន់តែក្រឡេកឃើញភ្លាមបុរសជាឪពុកដឹងថា វាពុំមែនជា “ដុំថ្ម” ធម្មតាទេ ។
គាត់យកវាទៅកោសលាងសម្អាត ហើយលេចចេញរូបរាង ជាខ្យងសមុទ្រម្យ៉ាងហៅថា Abalone និងថែមទាំងមានពណ៌ក្រហមកម្រជួប ។ សភាវៈសមុទ្រនេះ តែងត្រូវពពួកសារាយខ្យងសមុទ្រតូចៗហ៊ុំព័ទ្ធពីក្រៅមើលទៅដូចជាដុំថ្ម សូម្បីតែប្រជានេសាទ ប្រសិនបើភ្នែកពុំ “មុត” ក៏ងាយភ័ន្តច្រឡំដែរ ។
បុរសជាឪពុក បានណែនាំឲ្យកូនរបស់ខ្លួនផ្តាច់យកសាច់ “ដ៏ឆ្ងាញ់ពិសារ” របស់វាមកទុកធ្វើម្ហូប ។ សូម្បីសាច់របស់ Abalone នេះក៏មានតម្លៃថ្លៃណាស់ ។
ប្រការចម្លែកបំផុតនោះគឺក្រោយពេលផ្តាច់យកផ្នែកសាច់ចេញ ក្មេងស្រីបានប្រទះឃើញគុជខ្យង (ពែក-Pearl) ពណ៌ខ្មៅនៅខាងក្នុង ។ វាជាប្រភេទពែក (Pearl) កម្រពុំអាចផលិតសិប្បនិម្មិតបាន ។
ចុងក្រោយនាងប្រមូលបានគ្រាប់ពែកខ្មៅដ៏កម្រ ៤គ្រាប់ ។
គេពុំដឹងថា គ្រាប់គុជខ្យង ក្មេងស្រីនេះរកបានមានតម្លៃប៉ុន្មានទេ គ្រាន់តែដឹងថា វាពុំ “តិចឡើយ” ។ មុននោះ លោក Wesley Rankin បានរកឃើញគ្រាប់ពែក Big Pink ទម្ងន់ 470 carat នៅអំឡុងឆ្នាំ ១៩៩០។ នៅឆ្នាំ ១៩៩១ លោកលក់បានតម្លៃ, ៤,៧ លាន USD ៕ ចន្ទ្រា
ខាងក្រោមគឺជាវីដេអូក្មេងស្រីមហាលាភសំណាង