ប្រភពព័ត៌មានការទូតនៅរដ្ឋធានីប៉េកាំងនៅថ្ងៃម្សិលមិញនេះបង្ហើបប្រាប់ថា ប្រធានរដ្ឋចិនXi Jinping អាចនឹងមិនទៅកាន់ កូរ៉េខាងជើងដើម្បីចូលរួមខួបអនុស្សាវរីយ៍លើកទី៧០ ថ្ងៃបុណ្យជាតិប្រទេសនេះនៅថ្ងៃទី៩ខែកញ្ញា ដូចការគ្រោងទុកឡើយ។
តាមYonhap ដោយពុំឃើញមានសកម្មភាពដូចដូចសព្វដង ទើបធ្វើឱ្យមានការវាយតម្លៃបែបនេះ។
ឯកអគ្គរដ្ឋទូតកូរ៉េខាត្បូងប្រចាំចិន Noh Young-minឱ្យដឹងកាលពីចុងខែសីហាថា «មន្ដ្រីកំពូលរបស់ចិន» នឹងទៅទស្សនកិច្ចក្រុងព្យុងយ៉ាងនៅខែកញ្ញា។ រីឯប្រព័ន្ធផ្សព្វផ្សាយរបស់ជប៉ុនវាយតម្លៃថា លោកXi នឹងទៅទស្សនកិច្ចផ្ទាល់នៅកូរ៉េខាងជើង ក្នុងពេលដែលការព្យាករណ៍ច្រើនទៀតលើកឡើងថា ភារកិច្ចនេះត្រូវបានប្រគល់ឱ្យមន្ត្រីកំពូលម្នាក់របស់បក្សកុម្មុយនិស្ដចិន។
ចំណែកអ្នកនាំពាក្យក្រសួងការទេសចិនវិញអះអាងថា ពុំទាន់មានព័ត៌មានពីការដែលមេដឹកនាំប្រទេសនេះចូលរួម បុណ្យជាតិនៅកូរ៉េខាងជើង។ ដំណើរទស្សនកិច្ចរបស់ប្រធានរដ្ឋចិននៅឆ្នាំ២០០១និង២០០៥ សុទ្ធសឹងត្រូវបានប្រកាស ជាសាធារណៈមុនពេលប្រព្រឹត្តទៅមួយសប្ដាហ៍ ហើយស្ថានទូតប្រទេសទាំងពីរច្រើនទទួលបានការប្រកាស១០ថ្ងៃមុនពេលដំណើរទស្សនកិច្ចនេះប្រព្រឹត្តទៅ។
ប្រភពការទូតខាងលើបញ្ជាក់ថា លោកXi ពិតជាលំបាកនឹងទៅកាន់កូរ៉េខាងជើងក្នុងថ្ងៃទី៩ ខែ
កញ្ញានេះណាស់។ក្រុងប៉េកាំងហាក់ដូចជាកំពុងប្រមូលផ្ដុំទៅលើវេទិកាសហប្រតិបត្តិការចិន-អាហ្វ្រិក។ការទាល់ច្រក ក្នុងកិច្ចចរចាអាមេរិក-កូរ៉េខាងជើង ព្រមទាំងកត្តាពិបាកព្យាករណ៍ដទៃទៀតពិតជាមិនអាចវិនិច្ឆ័យប្រាកដប្រជាថាលោកXi នឹងទៅកាន់ក្រុងព្យុងយ៉ាងនៅថ្ងៃទី៩ខែកញ្ញាដែរឬទេ៕
សូយន
