ករណីអ្នកបើករថយន្តបង្ក ចរឹកជើងកាងដែលខ្លួនប្រាណពោរពេញទៅដោយសាក់ ត្រូវបានវាយតបតចាក់រហូតបាត់បង់ជីវិតក្រោមផ្លែកាំបិតរបស់ខ្លួនដែលប្រើសម្រាប់វាយប្រហារទៅលើជនរងគ្រោះជាអ្នកជិះកង់ ឥឡូវនេះ ជនរងគ្រោះដែលចាក់សម្លាប់ និងត្រូវចាប់ខ្លួនដោយប៉ូលីស ត្រូវបានដោះលែងឲ្យមានសេរីភាពវិញហើយ ដោយតុលាការបានចាត់ទុកថាជា «ករណីស្វ័យការពារខ្លួន» ។
SCMP បានរាយការណ៍ថា ជនរងគ្រោះជាអ្នកជិះកង់ឈ្មោះ Yu អាយុ ៤១ ឆ្នាំ ពុំត្រូវទទួលខុសត្រូវចំពោះបទល្មើសណាមួយនោះឡើយ សម្រាប់ការស្លាប់របស់ Liu អាយុ ៣៦ ឆ្នាំ ជាអ្នកបើករថយន្តចរឹកជើងកាង ដែលបានបើកបរបង្កឲ្យមានការប៉ះទង្គិចគេនៅលើដងផ្លូវ តែបែរជាមិនទទួលយកនូវកំហុសរបស់ខ្លួន និងថែមទាំងប្រើកាំបិតដេញចាក់ប្រហារយ៉ាងសាហាវ ទៅលើជនរងគ្រោះទៀត ។
យោងតាមប៉ូលីស Liu ត្រូវបានជនរងគ្រោះចាក់ចំនួន ៥ កាំបិត បណ្តលឲ្យមួយក្នុងចំណោមសរសៃឈាមដ៏សំខាន់ៗ និងពោះវៀន ត្រូវខូចខាតធ្ងន់ធ្ងរ ។ Liu ត្រូវបានបញ្ជូនទៅសង្គ្រោះនៅមន្ទីរពេទ្យជាបន្ទាន់ផងដែរ ប៉ុន្តែ ត្រូវបានប្រកាសស្លាប់ដោយសារបាត់បង់ឈាមច្រើនពេក ខណៈ Yu គ្រាន់តែរងរបួសត្រង់.កធ្ងន់ធ្ងរ និងតំបន់ក្បាល ។
យោងតាមព្រះរាជអាជ្ញា ក្នុងចំណោមករណីស្រដៀងគ្នានេះ ១០០ ដែលបានកើតឡើងរួចមកហើយនៅក្នុងប្រទេសចិន នោះមានតែ ៤ ករណីប៉ុណ្ណោះ ដែលត្រូវបានគេសង្ស័យថាបានស្វ័យការពារខ្លួនដោយស្របច្បាប់ និងជាង២០ករណីទៀត ហួសពីកម្រិតការពារខ្លួន ហើយក្រៅពីនេះពុំអាចស្វ័យការពារខ្លួនបានទេ ។
លោក Qu Xinjiu សាស្ត្រាចារ្យនៃសកលវិទ្យាល័យច្បាប់ និងវិទ្យាសាស្ត្រនយោបាយចិន បាននិយាយថា សាលក្រមនេះត្រូវបានអនុវត្តដ៏កម្រនៅក្នុងអតីតកាល ប៉ុន្តែ ករណីរបស់ Yu អាចជាការលើកទឹកចិត្តឲ្យទទួលយកយ៉ាងទូលំទូលាយចំពោះរឿងហេតុនេះ នៅក្នុងប្រព័ន្ធយុត្តិធម៌ ។
ជាមួយគ្នានេះផងដែរ សារព័ត៌មានរដ្ឋចិន ក៏បានសម្តែងការគាំទ្រយ៉ាងខ្លាំង សម្រាប់ការស៊ើបអង្កេតរបស់ប៉ូលីស និងពណ៌នាថា វាជា «ជោគជ័យមួយសម្រាប់ប្រព័ន្ធច្បាប់» ។
អ្នកអត្ថាធិប្បាយម្នាក់នៅលើ Xinhua បានសរសេរថា៖ «តម្លៃនៃច្បាប់ត្រូវតែឯករាជ្យ អំពីទស្សនៈរបស់សាធារណៈជន, ធ្វើសេចក្តីសន្និដ្ឋានអំពីអង្គច្បាប់ឲ្យសមហេតុផល និងយុត្តិធម៌ ។ ទទួលស្គាល់ចំពោះទង្វើស្វ័យការពារខ្លួនរបស់ជនរងគ្រោះ ដូចជាករណីនេះ» ៕ ឧត្តម
សូមអានរឿងរ៉ាវដែលបានកើតឡើង៖ «ខ្លួនប្រព្រឹត្តខុសមិនទទួល! តែបែរជាអាងសាក់ កាំបិត បង្កហិង្សាយ៉ាងសាហាវ មានអី ទីបំផុត ត្រូវជនរងគ្រោះចាក់សម្លាប់ក្រោមផ្លែកាំបិតរបស់ខ្លួន»
