នេះជាខណៈពេលដ៏ស្លុតរន្ធត់ និងគួរឲ្យអាសូរបំផុតមួយ ដែលទារកម្នាក់ត្រូវបានឃើញនៅក្នុងវីដេអូ បានខំប្រឹងតស៊ូនៅក្នុងទឹក ខណៈកំពុងលង់នៅក្នុងអាងហែលទឹកសម្រាប់កូនក្មេង ដោយពុំត្រូវបានចាប់អារម្មណ៍ពីម្តាយរបស់វា ដែលកំពុងតែងប់ងល់នឹងការលេងទូរស័ព្ទដៃ ។
តាមរយៈវីដេអូពីកាមេរ៉ាឃ្លាំមើល បានបង្ហាញទារកម្នាក់កំពុងតស៊ូដោយក្តីអស់សង្ឃឹមបំផុត ក្នុងរយៈពេលជាង ៩០ វិនាទី ខណៈម្តាយរបស់វា រវល់តែផ្តោតលេងទូរស័ព្ទរបស់នាង ។
ពីរបីវិនាទី មុនពេលហេតុការណ៍ដ៏រន្ធត់នេះកើតឡើង ស្ត្រីជាម្តាយម្នាក់ឈ្មោះ Wu ត្រូវបានឃើញនៅក្នុងវីដេអូ កំពុងឃ្លាំមើលកូនស្រីតូចរបស់នាងឈ្មោះ Xiao Ai មុនពេលនាងងាកខ្លួនផ្តោតទៅកាន់កូនក្មេងដទៃទៀត និងបន្ទាប់មក ប្រើទូរស័ព្ទដៃរបស់នាង ។
ខណៈកំពុងតែផ្តោតលើទូរស័ព្ទ Wu បានខកខានក្នុងការមើលកូន ដែលបានក្រឡាប់ចាក់ទីងនៅក្នុងអាង ហើយបន្ទាប់មក កូនស្រីតូចរបស់នាងក៏បានរអិលចេញពីពោងហែលរបស់វា ។
រឿងរ៉ាវបន្ទាប់ គួរឲ្យអាសូរណាស់ ខណៈទារកនោះកំពុងតស៊ូនៅក្នុងទឹក ក្មេងប្រុសតូចម្នាក់ដែលក៏ស្ថិតនៅក្នុងអាង បានព្យាយាមទៅកាន់ទារកនោះ និងសូម្បីប៉ុនប៉ងដាក់ពោងហែលលើនាង ប៉ុន្តែ វាពុំអាចធ្វើទៅបាននោះទេ ។
នៅក្នុងឃ្លីប ក្មេងប្រុសតូចនោះ ក៏បានត្រូវបានឃើញព្យាយាមប្រឹងហែលទៅកៀក និងស្រែកក្នុងកាយវិការព្រមានដល់ម្តាយរបស់ទារកនោះ ប៉ុន្តែ ស្ត្រីជាម្តាយនោះពុំអើពើនឹងពីការព្រួយបារម្ភរបស់វាទេ ។ ហេតុការណ៍នេះបានអូសបន្លាយរហូតជាង ១នាទីកន្លះ មុនពេល ស្ត្រីជាម្តាយនោះបានចាប់អារម្មណ៍ និងប្រញាប់ប្រញាល់ស្រង់ទារករបស់នាងចេញពីក្នុងទឹកអាង ។ ម្តាយនេះបន្ទាប់មក ក៏បានអនុវត្តវិធីសង្គ្រោះបឋម ។
បន្ទាប់ពីធ្វើការសម្រួលត្រង់ដើមទ្រូងជាមូលដ្ឋាន ទៅលើកូនស្រីរបស់ខ្លួន ស្ត្រីនោះបន្ទាប់មក ក៏បាននាំយកនាងទៅសង្គ្រោះបន្ទាន់នៅមន្ទីរពេទ្យខេត្ត Fujian ។ យោងតាមវេជ្ជបណ្ឌិតផ្នែកសង្គ្រោះបន្ទាន់ Lin Shuqin នោះខ្លួនប្រាណរបស់ទារករងគ្រោះនេះបានប្រែពណ៌ស្វាយទៅហើយ នៅពេលនាងបានមកដល់មន្ទីរពេទ្យ ដោយពុំលោតចង្វាក់បេះដូង និងស្នូរដង្ហើម ។
យោតាម Yaoo7 News ទារកឈ្មោះ Xiao Ai រងគ្រោះនេះ បានកំពុងស្ថិតក្នុងស្ថានភាពសន្លប់ និងកំពុងត្រូវបានព្យាយាមរក្សាអាយុជីវិត តាមរយៈពឹងផ្នែកទៅលើឧបករណ៍ដកង្ហើម បន្ទាប់ពីបានជួបគ្រោះថ្នាក់ក្នុងហេតុការណ៍លង់ទឹក នៅក្នុងអាងហែលទឹកសម្រាប់កូនក្មេង Beibei Lamu កាលពីថ្ងៃទី៣១ ខែសីហា ឆ្នាំ២០១៨ នៅក្នុងស្រុក Cangshan នៅក្នុងទីក្រុង Fuzhou ខេត្ត Fujian ភាគខាងកើតនៃប្រទេសចិន ៕ ចន្ទី (nextshark)
