គេហទំព័រសារព័ត៌មាន pattayaone.news បានចុះផ្សាយឲ្យដឹងថា អ្នកបើកបររថយន្តដឹកអ្នកដំណើរខ្នាតតូចម្នាក់ ត្រូវបានឃើញនៅក្នុងកាមេរ៉ា បានស្តីបន្ទោសយ៉ាងខ្លាំង ទៅលើភ្ញៀវទេសចរបរទេសម្នាក់ ដែលបានត្អូញត្អែរពីការសកម្មភាពបើកបរដ៏ប្រឈមនឹងគ្រោះថ្នាក់របស់គាត់ ។
វីដេអូនៃហេតុការណ៍នេះ ដែលត្រូវបានចែករំលែកនៅលើ Facebook បានកើតឡើង នៅពេលដែលជនបរទេសម្នាក់បាននិយាយថា បុរសម្នាក់នោះកំពុងបើកបរក្នុងល្បឿនលឿនពេក ហើយប្រាប់គាត់ដោយភាពគួរសម ឲ្យបន្ថយល្បឿន ក្នុងអំឡុងពេលធ្វើដំណើរពី Surat Thani ទៅកាន់ Phuket ។
រូបភាពមួយដែលត្រូវបានចែករំលេកដោយ Sanook News បានបង្ហាញសញ្ញាល្បឿនរថយន្ត ស្ថិតក្នុងកម្រិត ១៣០ គីឡូម៉ែត្រ/ម៉ោង ។
ក្នុងអំឡុងពេលធ្វើដំណើរ ភ្ញៀវបរទេសនោះបានប្រាប់ទៅកាន់តៃកុងរូបនោះដដែលៗ ឲ្យបន្ថយល្បឿន ព្រោះតែបារម្ភខ្លាចក្រែងគ្រោះថ្នាក់នឹងអាចកើតឡើង ។
ទោះយ៉ាងណា ជំនួសឲ្យការព្យាយាមបើកបរដោយសុវត្ថិភាព, ទទួលខុសត្រូវ និងត្រឹមល្បឿនកំណត់ អ្នកបើកបរគ្មានខ្វល់ពីអាយុជីវិតអ្នកដទៃរូបនេះ បានឈប់រថយន្ត និងចាប់ផ្តើមផ្ទុះកំហឹងខ្លាំងៗ ដាក់ជនបរទេសនោះតែម្តង ។
តៃកុងឆ្កួតៗនេះបាននិយាយថា៖ «ប្រសិនអ្នកខ្លាចស្លាប់ ហេតុអ្វីអ្នកមិនចុះចេញទៅ?»
គាត់បានបន្ថែមថា៖ «ជនជាតិថៃមិនបារម្ភ អំពីការស្លាប់ទេ ហេតុអ្វីបានជាខ្លាច?»
ការប្រឈមមុខគ្នាបានបញ្ចប់ នៅពេលអ្នកដំណើរដទៃចានធ្វើអន្តរាគមន៍ ហើយអ្នកបើកបរនេះក៏បានបើករថយន្តបន្តដំណើរ ។
ទោះយ៉ាងណា មានអ្នកដំណើរជនជាតិថៃជាច្រើននាក់ ក៏បានត្អូញត្អែរផងដែរថា តៃកុងរូបនេះជាមនុស្សមានអត្តចរឹកមិនសមរម្យ ហើយសូម្បីយកថ្លៃឈ្នួលដ៏ហួសហេតុ ១៥០ បាត សម្រាប់ការធ្វើដំណើររបស់ពួកគេមួយនេះ ដែលពុំនឹកស្មានដល់ ។
មនុស្សនៅលើបណ្តាញសង្គម បានខមិនរិះគន់តៃកុងឡាននេះយ៉ាងធ្ងន់ៗ ហើយនិយាយថា នាយកដ្ឋានដឹកជញ្ជូន ត្រូវបានមានវិធានការបន្ថែមទៀត ទៅលើពួកតៃកុងឡានដឹកអ្នកដំណើរដ៏កាចសាហាវបែបៗនេះ ។
អ្នកដទៃទៀត បាននិយាយថា វីដេអូឃ្លីបមួយនេះ ប្រាកដណាស់នឹងបំផ្លាញរូបភាពរបស់ប្រទេសថៃ ជាពិសេសក្នុងចំណោមភ្ញៀវទេសចរតែម្តង ។
ទោះយ៉ាងណា ម្ចាស់រថយន្តនេះ ទីបំផុតត្រូវបានឃាត់ខ្លួន និងបង្គាប់ឲ្យបង់ប្រាក់ពិន័យចំនួន ៥០ ពាន់បាត (ស្មើនឹង ១៥០០ ដុល្លារ) សម្រាប់ទង្វើបើករថយន្តក្នុងនាមជាអ្នកផ្តល់សេវាដល់អ្នកដំណើរដ៏មិនធម្មតានេះ ។ នេះបើយោងតាមការចុះផ្សាយរបស់ bangkokpost ៕ ឧត្តម