បរិយាកាសក្នុងអង្គប្រជុំរវាងតំណាងបណ្ដាប្រទេសជាសមាជិកនៃវេទិកាប្រជុំកោះប៉ាស៊ីហ្វិកអំពីការប្រែប្រួលធាតុអាកាសនៅប្រទេស Nauru ថ្ងៃទី៤ ខែកញ្ញា បានកើតឡើងស្ថានភាពតឹងតែង ក្រោយពេលប្រតិភូចិន ខឹងសម្បាចាកចោលការប្រជុំ ព្រោះតែត្រូវបដិសេធមិនឱ្យថ្លែងសុន្ទរកថាមុនគេ។
តាម AFO ប្រធានាធិបតី Nauru Baron Waqa ចាត់ទុកថា បេសកជនពិសេសចិន Du Qiwen បានមានអាកប្បកិរិយាខ្វះសុជីវធម៌ ដោយសំអាងខ្លួនជាប្រទេសធំ ចង់គាបសង្កត់ប្រទេសតូចៗ ហើយបានបោះបង់ចោលអង្គប្រជុំពាក់កណ្ដាលទី។
ហេតុការណ៍ចាប់ផ្ដើមពេលដែលលោក Du ស្វែងរកវិធីដើម្បីថ្លែងសុន្ទរកថាមុនគេក្នុងអង្គប្រជុំពិភាក្សាអំពីការប្រែប្រួលធាតុអាកាសនៅក្នុងវេទិកានេះ ហើយត្រូវបានប្រធានាធិបតីម្ចាស់ផ្ទះធ្វើការបដិសេធ។ប្រធានាធិបតី Waqa ចាត់ទុកថា ក្នុងអង្គប្រជុំនេះ បណ្ដាមេដឹកនាំប្រទេសគឺជាអ្នកត្រូវថ្លែងសុន្ទរកថាមុន ព្រោះលោកDu គ្រាន់តែជាតំណាងប្រទេសប៉ុណ្ណោះ។ភ្លាមៗ លោកDu និងប្រតិភូចិនបានប្រើពាក្យសម្ដីខ្លាំងៗ សម្ដែងការមិនពេញចិត្ត រួចក៏ចាកចេញពីបន្ទប់ប្រជុំ។
លោកWaqa ពោល៖ លោកDu ចេះតែទាមទារសុំថ្លែងសុន្ទរកថាមុន ធ្វើឱ្យអង្គប្រជុំបណ្ដាមេដឹកនាំត្រូវអាក់ខានច្រើននាទី ខណៈពេលដែលគាត់គ្រាន់តែជាមន្ត្រីម្នាក់។ប្រហែលដោយសារគាត់មកពីប្រទេមួយធំ ទើបចង់សម្លុតពួកខ្ញុំ។
តាម AFP មុនពេលហេតុការណ៍នេះកើតឡើង ប្រតិភូចិនបានអន់ចិត្ត ព្រោះតែសាមីប្រទេសពុំបានបោះត្រាផ្ដល់ទិដ្ឋាការទូតដល់តំណាងចិន ហើយបានបោះត្រាទិដ្ឋាការឯកជន ប៉ុណ្ណោះ។
សាជាថ្មីម្ដងទៀត ហេតុការណ៍នេះបានធ្វើឱ្យកក្រើកសាជាថ្មីពីរឿងដែលក្រុងប៉េកាំងសំអាងលើឥទ្ធិពលរបស់ខ្លួន តាមរយៈប្រាក់ជំនួយ ហើយមានអាកប្បកិរិយាមើលស្រាលសាមីប្រទេសម្ចាស់ផ្ទះ។
ចិនពុំមែនជាសមាជិកនៃវេទិកានេះទេ ប៉ុន្ដែជាប្រទេសមួយក្នុងចំណោមប្រទេស១៨ ដែលចាត់តំណាងចូលរួមអង្គប្រជុំនេះក្នុងនាមជាដៃគូចរចាប៉ុណ្ណោះ៕
សូយន