ខេត្តមណ្ឌលគិរី ៖ ដើម្បីពង្រឹងរបៀបរបបការងារ របស់រដ្ឋបាលខេត្តឱ្យមានប្រសិទ្ធភាព លោក ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី បានក្រើនរំលឹកដល់ប្រធានមន្ទីរអង្គភាពជុំវិញខេត្ត និងអភិបាលក្រុង ស្រុក ណាដែលមិនបានចូលរួមប្រជុំប្រចាំខែ ឬប្រជុំសាមញ្ញរបស់ក្រុមប្រឹក្សាខេត្ត អវត្តមានរយៈពេល៣ដង គ្មានច្បាប់ នឹងធ្វើលិខិតស្នើទៅរដ្ឋមន្ត្រី ។ លោកបានថ្លែងថាប្រធានមន្ទីរអង្គភាពណា ដែលអវត្តមានរយៈពេល៣ដង គ្មានច្បាប់ មិនបានចូលរួមប្រជុំទេ ក្នុងពេលកិច្ចប្រជុំបន្តបន្ទាប់ទៀត។
លោកបានមានប្រសាសន៍ ក្នុងកិច្ចប្រជុំសាមញ្ញលើកទី៥២ របស់ក្រុមប្រឹក្សាខេត្ត ឆ្នាំទី៥ អាណត្តិទី២ នៅសាលប្រជុំអគារក្រុមប្រឹក្សាខេត្តមណ្ឌលគិរី នាព្រឹកថ្ងៃទី៥ ខែកញ្ញា ឆ្នាំ២០១៨។
លោក អភិបាលខេត្ត បានបញ្ជាក់ថា កន្លងមកឃើញថា ប្រធានមន្ទីរអង្គភាពមួយចំនួន មិនសូវយកចិត្តទុកដាក់អនុវត្តការងាររបស់ខ្លួន ជាពិសេស ពេលប្រជុំប្រចាំខែ របស់គណៈអភិបាលខេត្ត និងកិច្ចប្រជុំសាមញ្ញរបស់ក្រុមប្រឹក្សាខេត្ត ដែលតែងតែឱ្យអនុប្រធាន ឬមន្ត្រី ឱ្យមកចូលរួមប្រជុំ ហើយក្តាប់ការងារអត់បាន ដែលធ្វើឱ្យពិបាកដោះស្រាយ។ ដូច្នេះ លោកអភិបាលខេត្ត បានក្រើនរំលឹកប្រធានមន្ទីរអង្គភាពទាំងអស់ ព្រោះកិច្ចប្រជុំខាងលើនេះ ដែលចាំបាច់ឱ្យប្រធាន ឬអនុប្រធានមន្ទីរណាដែលក្តាប់ការងារបានច្បាស់លាស់ ដើម្បីត្រួតពិនិត្យ វាយតម្លៃ និងឆ្លុះបញ្ចាំងអំពីសមិទ្ធផលការងារ និងបញ្ហាប្រឈមនានា ក្នុងការដោះស្រាយរួមគ្នា។ ជាងនេះទៅទៀត លោក អភិបាលខេត្ត “បានស្នើឱ្យ នាយករដ្ឋបាលខេត្ត ត្រូវស្រង់ឈ្មោះប្រធានមន្ទីរណាមួយអវត្តមាន៣ដង គ្មានច្បាប់ គ្មានបេសកម្ម មិនបានចូលរួមប្រជុំសំខាន់ៗរបស់រដ្ឋបាលខេត្ត នឹងសរសេរលិខិតផ្ញើជូនទៅរដ្ឋមន្ត្រី”។
លោក ម៉ែន ង៉ុយ ប្រធានក្រុមប្រឹក្សាខេត្ត បានណែនាំ និងជំរុញបន្ថែមដល់រដ្ឋបាលខេត្ត មន្ទីរអង្គភាព និងអាជ្ញាធរក្រុងស្រុក រួមទាំងសមត្ថកិច្ចទាំងអស់ ត្រូវខិតខំយកចិត្តទុកដាក់អនុវត្តការងាររបស់ខ្លួនបន្ថែមទៀត ជាពិសេស លើការងារផ្តល់សេវាសាធារណៈឱ្យមានប្រសិទ្ធភាព ដើម្បីធ្វើយ៉ាងណា ជួយកាត់បន្ថយភាពក្រីក្រជូនប្រជាពលរដ្ឋ និងធ្វើឱ្យខេត្តមណ្ឌលគិរី ប្រែមុខមាត់ថ្មីបន្ថែមទៀត៕ ដោយ៖បញ្ញាស័ក្តិ
