ស្រ្តីជនជាតិថៃ នាង Woranan Ratrawiphukkun ដែលបានកំពុងរស់នៅជាមួយបុរសអង់គ្លេសលោក Vernon Unsworth អស់រយៈពេល ៧ ឆ្នាំ មកហើយ បានចេញមុខនិយាយប៉ុន្មានម៉ោង បន្ទាប់ពីការអះអាងដ៏ជ្រុលហួសហេតុចុងក្រោយរបស់មហាសេដ្ឋី Tesla ។
មិត្តស្រីរបស់វីរជនជួយសង្គ្រោះក្មេងៗនៅរូងលិចទឹក Tham Luang សញ្ជាតិអង់គ្លេសម្នាក់នេះដែលត្រូវបានផ្តល់ឈ្មោះឲ្យនាមថា «paedo» ឬ «ជនប្រព្រឹត្តអំពើផ្លូវភេទលើកូនក្មេង» ពីសំណាក់លោក Elon Musk, បានបកឲ្យវិញថា ការចោទប្រកាន់ដ៏ហួសហេតុរបស់មហាសេដ្ឋីរូបនេះ ពិតជាគួរឲ្យអស់សំណើចមែនទែន ។
ស្ត្រីវ័យ ៤០ ឆ្នាំ រូបនេះដែលត្រូវបានស្គាល់ថា Tik បានប្រាប់គេហទំព័រសារព័ត៌មានថៃ Coconuts ថា៖ «ព័ត៌មានអំពីថាគាត់រៀបការជាមួយកូនក្រមុំក្មេងអាយុ១២ឆ្នាំ ពិតជារឿងគួរឲ្យអស់សំណើចខ្លាំងណាស់ លោកអើយ…!!» ។
Tik ដែលបានចែករំលែកផ្ទះជនបទមួយនៅជាមួយលោក Vernon Unsworth ដែលបច្ចុប្បន្នមានវ័យ ៦៣ ឆ្នាំ នៅក្បែរ Chiang Rai បានបន្ថែមថា៖ «Vernon គឺជាមនុស្សដ៏ល្អម្នាក់ ។ គាត់កម្រមានជម្លោះជាមួយអ្នកណានោះទេ ហើយគ្រប់គ្នាក៏បានស្រលាញ់ចូលចិត្តគាត់ដែរ» ។
«ពួកយើងបានចំណាយពេលវេលានៃជីវិតរបស់ពួកយើង រួមរស់ជាមួយគ្នាអស់រយៈពេល ៧ ឆ្នាំ មកហើយ -គាត់ជាមនុស្សដ៏ល្អម្នាក់ ហើយស្លូតណាស់ ។ គាត់គិតសុខទុក្ខអ្នកដទៃជាជាងខ្លួនឯងគាត់ទៅទៀត» ។
«ខ្ញុំគ្រាន់តែដឹងថា Vern ជាមនុស្សល្អបានហើយ ។ ប្រសិនបើគាត់មិនមែនជាមនុស្សល្អទេ នោះពួកគេយើងក៏ពុំអាចនៅតែរួមរស់ជាមួយគ្នារហូតមកទល់ថ្ងៃនេះនោះទេ» ៕ ចន្ទី (thesun.co.uk)
