Ethan អាយុ ១៣ឆ្នាំ ត្រូវបានចាត់ទុកជាក្មេងជំទង់ ខូចលែងនិយាយ ប្រដៅលែងស្តាប់ ។ វាតែងលួចរបស់របរលុយកាក់ វាយតប់គ្នា ប្រៀបដូចពួកយូកូង បណ្តាលឲ្យអាណាព្យាបាលពិតជារង… ទុក្ខព្រោះមិនដឹងដោះស្រាយបែបណា ។
ក្រឡេកមើលបងប្រុសរបស់ Ethan ក៏ធ្លាប់ជាប់គុក ។ ប៉ុន្តែក្រោយជីវិតក្នុងជ្រុង១រយៈមកស្រាប់តែវាចេះកែប្រែមាយាទក្លាយជាត្រឹមត្រូវ។ ព្រោះតែចង់ឲ្យ Ethan ប្តូរមាយាទដូចបងប្រុសពួកគេបានទៅកាន់ពន្ធនាគារ ហើយអង្វករសុំរឿងមួយ… ។
ស្តាប់ឮឪពុកម្តាយសម្រេចប្រគល់វាឲ្យទៅពន្ធនាគារ Ethan នៅតែបន្តឆ្លើយយ៉ាងរឹងរូសថា ៖ “មិនអ្វីទេ! ខ្ញុំដាច់ខាតមិនខ្លាច គ្មានអ្វីធ្វើឲ្យខ្ញុំប្រែប្រួលបានទេ!” ។
ពេលចូលដល់ពន្ធនាគារភ្លាម Ethan បានជួបក្រុមអនុរក្ស ហើយពួកគេបានស្រែកជេរស្តី ព្រមទាំងពេបជ្រាយមើលងាយវា ។ មួយសន្ទុះឃើញទឹកមុខរបស់វាហាក់ប្រែប្រួល ។ ទឹកមុខ “យូកូង” រលាយបាត់ ជំនួសដោយសភាពភ័យខ្លាច ។
វាចាប់ផ្តើមស្រក់ទឹកភ្នែក ក្រោយស្តាប់ឮពាក្យពេបជ្រាយរបស់អនុរក្សគុក ស្របពេលដែលនៅកញ្ចក់ខាងក្រៅពួក “ឧក្រិដ្ឋជន” សំឡឹងមើលមុខវាត្មែរ ហើយកដៃគោះកញ្ចក់ ហាក់ចង់ស្រវ៉ាចាប់វាមក… ខាំស៊ីទាំងរស់ ។ Ethan កាន់តែធ្លាក់ក្នុងសភាពភ័យខ្លាចឡើងញ័រ ។
ចុងក្រោយរឿង “សាហាវបំផុត” បានមកដល់ ៖ វាត្រូវបង្ហាញមុខផ្ទាល់ជាមួយពួក “ឧក្រិដ្ឋជន” ទាំងនោះ ។ ពួកគេបានស្ទុះមកចោមរោមវា ហើយផ្ទុះសំណើចបង្ហាញភាពមាក់ងាយហើយប្រើសម្តីអាក្រក់ៗ… ធ្វើឲ្យវាបាក់ស្មារតីទាំងស្រុង ។
…ហើយនេះជា Ethan ១ខែក្រោយមក វាបានក្លាយជាក្មេងរីករាយ ស្រស់ស្រាយ ប្លែកពី Ethan មុន ដែលខ្ជិលច្រអូស គ្មានស្នាមញញឹម ។
ឪពុករបស់ Ethan រំភើបចិត្តពោលថា កូនរបស់ខ្លួន “រៀនសូត្រ” បានច្រើនក្រោយ “រស់នៅមួយរយៈ” ក្នុង…គុក ។ វាមានគំនិតយល់ដឹងពីជីវិតខុសពីពេលមុន ។
ការប្រែប្រួលចរិតមាយាទរបស់ Ethan ធ្វើឲ្យគ្រួសាររីករាយសប្បាយ ។
វាកំពុងអង្គុយកំដរលោកយាយមើលកុន ។
ជាធម្មតាក្មេងដែលខូច រឹងរូសប្រដៅលែងស្តាប់ ពេលខ្លះគឺព្រោះវាមិនទាន់យល់ដឹងពីរសជាតិជីវិត ។ ហេតុនេះពាក្យសម្តីប្រៀនប្រដៅទន់ភ្លន់ មិនចូលត្រចៀកវាទេ ។ វិធីសាស្ត្រប្រហែលមានតែចាប់វាឲ្យកកិតនឹងជីវិតពិតៗ…! ។
ប៉ុន្តែវិធីសាស្ត្រនេះ ហាក់ដូចជា “ជ្រុលបន្តិច” ប៉ុន្តែវាក៏ស័ក្តិសិទ្ធដែរ ព្រោះវាអាចជួយទាញក្មេងប្រុសដែលនៅក្បែរជ្រោះដ៏ងងឹតនៃសង្គមឲ្យមកទីភ្លឺវិញបាន ៕ ចន្ទ្រា
ប្រិយមិត្តយល់យ៉ាងណាដែរ! ?
