ម្តាយចុងម្នាក់ត្រូវបានចាប់ខ្លួន ក្នុងករណីចោទប្រកាន់បង្គាប់ឲ្យជនអន្ធពាលមួយក្រុមរំលោភ និងសម្លាប់កូនស្រីចុងរបស់ខ្លួនអាយុ ៩ ឆ្នាំ នៅក្នុងរដ្ឋ Kashmir ភាគខាងជើងនៃប្រទេសឥណ្ឌា ។
អាជ្ញាធរបានចាប់ខ្លួនមនុស្ស ៦ នាក់ ក្នុងនោះរួមមានម្តាយ និងបងប្រុសចុង របស់ក្មេងស្រីរងគ្រោះ ដែលជាប់ពាក់ព័ន្ធក្នុងអំពើឃាតកម្មដ៏អាក្រក់នេះ ។
យោងតាមមន្ត្រីក្នុងតំបន់ ម្តាយចុងរបស់ក្មេងស្រីរងគ្រោះ បានណែនាំឲ្យកូនបុរសរបស់ខ្លួនអាយុ ១៤ ឆ្នាំ និងមនុស្ស៣នាក់ផ្សេងទៀត រំលោភកូនស្រីនៅចំពោះមុខរបស់នាង ។
ម្តាយចុងនេះ ដែលត្រូវបានចោទប្រកាន់ថា បានប្រច័ណ្ឌទៅនឹងការយកចិត្តទុកដាក់ ខណៈប្តីក្រោយរបស់នាងកំពុងផ្តល់ឲ្យកូនស្រីរបស់គាត់ច្រើនជាង បានឈរមើលយ៉ាងព្រងើយ ខណៈកូនស្រីចុងដ៏អភព្វត្រូវបានរំលោភជាច្រើនលើក ។
NDTV រាយការណ៍ឲ្យដឹងថា ក្មេងស្រីរងគ្រោះបានបាត់ខ្លួនអស់រយៈពេល ១០ ថ្ងៃ មុនពេលប៉ូលីសរកឃើញសាកសពរបស់នាង កាលពីថ្ងៃអាទិត្យ នៅក្នុងព្រៃមួយ ចម្ងាយ១គីឡូម៉ែត្រពីផ្ទះរបស់នាងនៅក្នុងស្រុក Baramulla ។
ប៉ូលីសបានបញ្ជាក់ថា ក្មេងស្រីរងគ្រោះត្រូវបានធ្វើទារុណកម្ម, ភ្នែករបស់នាងត្រូវបានឆូត និងខ្លួនរបស់នាងត្រូវរលាកដោយទឹកអាស៊ីត ។
មន្ត្រីប៉ូលីសជាន់ខ្ពស់លោក Imtiyaz Hussain ត្រូវបានដកស្រង់សម្តីដោយនិយាយថា៖ «ករណីនេះត្រូវបានរកឃើញថា ម្តាយចុងនោះបានកំពុងចងគំនុំទៅនឹងប្រពន្ធទី២របស់ប្តី និងកូនៗរបស់នាង» ។
លោក Hussain បានកត់សម្គាល់ឃើញថា បន្ទាប់ពីក្មេងស្រីរងគ្រោះត្រូវបានរំលោភ នាងត្រូវបានរឹតកដោយម្តាយចុង និងបង្គាប់យុវជនអាយុ ១៩ ឆ្នាំ យកពូថៅវាយសម្លាប់តែម្តង ៕ ឧត្តម (nextshark)
