Liu បានត្រូវសមត្ថកិច្ច Kenya ចាប់ខ្លួន បន្ទាប់ពីប្រៀបធៀបពលរដ្ឋនិងប្រធានាធិបតីប្រទេសនេះ«ដូចស្វា»ក្នុងខ្សែវីដេអូមួយបង្ហោះលើបណ្ដាញសង្គម ។
តាមAFP Liu Jiaqi គឺជាពាណិជ្ជករប្រទេសចិន កំពុងរកស៊ីនៅ Kenya បានត្រូវចាប់ខ្លួនកាលពីថ្ងៃទី៦កញ្ញា បន្ទាប់ពីខ្សែវីដេអូមានរយៈពេល២នាទីកន្លះបង្ហាញទិដ្ឋភាព Liu ប្រកែកគ្នានឹងបុគ្គលិក ត្រូវបានបង្ហោះលើ Twitter ព្រមទាំងបណ្ដាញសង្គមដទៃទៀត។ Liuបាននិយាយថា៖ «ជនជាតិ Kenya ដូចស្វា រួមទាំងUhuru Kenyatta (ប្រធានាធិបតី Kenya)» បណ្ដាបុគ្គលិករបស់ Liu បាននិយាយថា Liu គួរវិលត្រឡប់ទៅប្រទេសចិនវិញប្រសិនបើមានគំនិតបែបចំពោះជនជាតិKenya។ ការឆ្លើយតបនេះបានធ្វើឱ្យត្រកូល Liu កាន់តែមានប្រតិកម្មខ្លាំងជាងមុន ហើយស្រែកថា«ខ្ញុំមិនចូលចិត្តទីនេះ មិនចូលចិត្តមនុស្សស្វា ខ្ញុំមិនចូលចិត្តនិយាយជាមួយពួកគេ ខ្លួនប្រាណគេមានក្លិនអាក្រក់ ប្រជាជនក្រផង ល្ងង់ផង ហើយថែមទាំងខ្មៅទៀត។ ខ្ញុំពិតជាមិនចូលចិត្ត។ ហេតុអ្វីបានជាពួកគេមិនដូចពួកស្បែកស មិនដូចអាមេរិកអ៊ីចឹង?។
Liu បញ្ជាក់ថា មូលហេតុតែមួយគត់ដែលខ្លួនគេបន្តនៅKenya នោះគឺ«លុយ» ។ គេនៅពុំទាន់ដឹងច្បាស់ថាការងាររបស់ Liuនៅប្រទេសនេះគឺជាអ្វី។ជនជាតិKenya មួយចំនួនបានអំពាវនាវឱ្យចោទប្រកាន់ទោស Liu ទៅកាន់តុលាការ។
នាយកដ្ឋានប្រទេសKenya ឱ្យដឹងថា Liuត្រូវបានដកហូតលិខិតអនុញ្ញាតការងារ ហើយនឹងត្រូវបណ្ដេញឱ្យទៅប្រទេសវិញ។
នេះពុំមែនជាលើកដំបូងទេដែលជនជាតិចិននៅKenya ត្រូវបានចោទប្រកាន់ថារើសអើងពូសាសន៍។កាលពី៣ឆ្នាំមុន ភោជនីយដ្ឋានចិនមួយនៅរដ្ឋធានី Nairobi របស់Kenya បានត្រូវសមត្ថកិច្ចបិទទ្វារនិងផាកពិន័យព្រោះហ៊ានសរសេរថា មិនទទួលភ្ញៀវស្បែកខ្មៅក្រោយម៉ោង១៥ល្ងាច៕
លីសា
