នេះជាហេតុការណ៍គ្រោះថ្នាក់ចរាចរណ៍ដ៏ស្លុតរន្ធត់មួយ ដែលសិស្សស្រីបឋមសិក្សាម្នាក់ ត្រូវបានរថយន្ត១គ្រឿងបុកហើរប៉ើងដូចស្លឹក ខណៈនាងកំពុងឆ្លងផ្លូវ ដែលសូម្បីភ្លើងបៃតងបានបើកទៅហើយ ។ ហេតុការណ៍នេះបានកើតឡើងនៅចំណុចភ្លើងស្តុបនៃស្ពានអាកាស SJKC Kwang Hwa នៅក្នុង Sungai Nibong, Penang ប្រទេសម៉ាឡេស៊ី កាលពីថ្ងៃទី៤ កញ្ញា ។
ផ្អែកតាមវីដេអូកាមេរ៉ាឃ្លាំមើល ឪពុកម្តាយជាច្រើនបានកំពុងឈរនៅលើចិញ្ចើមផ្លូវឆ្លងកាត់ ខណៈរង់ចាំភ្លើងបៃតងផ្តល់ឱកាសឲ្យ ។ នៅពេលភ្លើងបើក ម្នាក់ក្នុងចំណោមក្មេងៗសិស្សសាលាទាំងនោះ បានរត់ឆ្លងទៅមុនគេ ប៉ុន្តែ ខណៈពេលនាងឆ្លងដល់ផ្នែកខាងស្តាំនៃផ្លូវ និងបានឈប់បន្តិច ស្រាប់តែរថយន្តពណ៌ខ្មៅ១គ្រឿង ចូលមកដល់ក្នុងល្បឿនដ៏លឿន បានបុកនាងយ៉ាងពេញទំហឹង បណ្តាលឲ្យហើរប៉ើងខ្ទាចប្រហែល ២ ម៉ែត្រ ពីមុខរថយន្តគួរឲ្យអាសូរតែម្តង ។ សំណាងហើយ ដែលរថយន្តនោះ បានគ្រប់គ្រងចាប់ហ្វ្រាំងអូសពីចម្ងាយ ដោយពុំបានបន្តកិនបន្ថែម ។
ខណៈហេតុការណ៍ដ៏រន្ធត់នេះបានកើតឡើង ភ្លាមៗនោះ ម្តាយរបស់នាងបានប្រញាប់ប្រញាល់រត់ទៅលើកកូនស្រីរបស់ខ្លួនយ៉ាងលឿន ។ ក្មេងស្រីនេះត្រូវបានគេរាយការណ៍ថា បានរងរបួសស្រាលនៅត្រង់ចង្កា និងជើងទាំងសងខាងរបស់នាង ។
ទោះជាយ៉ាងណា នេះជាករណីមួយដែលច្បាប់ត្រូវតែចាត់វិធានការឲ្យបានម៉ឺងមាត់បំផុត ចំពោះអ្នកបើកបរណាដែលល្មើសនឹងភ្លើងក្រហមបែបនេះ ៕ ចន្ទី (worldofbuzz)
