នៅថ្ងៃទី ៦ ខែកញ្ញា ឆ្នាំ ២០១៨ ពលរដ្ឋខេត្តយ៉ាឡាយ (Gialai) សុំមិនបញ្ចេញឈ្មោះម្នាក់ បានទៅកាន់ស្នាក់ការរបស់កាសែត Gialai Online ហើយអះអាងថា គាត់បានដឹងទីតាំងពិតប្រាកដ សង្ស័យថាជាយន្តហោះ MH 370 របស់ម៉ាឡេស៊ី ដែលបាត់ស្រមោលពីថ្ងៃទី ៨ ខែមីនា ឆ្នាំ ២០១៤ ។ បុរសនេះនៅបានផ្តល់ឲ្យកាសែតអនឡាញនេះ នូវ Clip ដែលគាត់បានថតតាំងពី ៤ឆ្នាំមុន លើ Google earth ពីរូបភាពដែលគាត់បានមើលឃើញពេលនោះ ។
រូបភាពសង្ស័យថា ជាយន្តហោះ MH 370 របស់ក្រុមហ៊ុនអាកាសចរណ៍ម៉ាឡេស៊ី ស្ថិតក្នុងបាតបឹងមួយ ដែលពលរដ្ឋ Gielai បានផ្តល់ឲ្យ។
គាត់រំលឹកឡើងវិញថា ៖ ៤ឆ្នាំមុនពេលគាត់កំពុងរកស៊ីនៅខេត្តដាក់ណុង (DACNONG) ដោយចៃដន្យពេលកំពុងស្វែងរកព័ត៌មានពីរូបភាពផ្កាយរណបលើបណ្តាញអ៊ិនធើណេត ស្រាប់តែប្រទះឃើញយន្តហោះមួយគ្រឿងមានទំហំស្រដៀងនឹងយន្តហោះ MH 370 ស្ថិតក្នុងបាតបឹងមួយ ។ គាត់ក៏ថត Clip រូបភាពនោះ ព្រមទាំងទីតាំងរបស់វាលើ Google Earth ។ បច្ចុប្បន្នផ្ទៃបឹងនេះ ទឹកកើនឡើងខ្ពស់ ពុំអាចមើលឃើញដោយភ្នែកធម្មតាបានឡើយ ប្រសិនបើគ្រាន់តែនៅពីលើបឹង ឬថតពីផ្កាយរណបនោះ ។
ក្រោយមកគាត់បានបង្ហោះ Clip នេះឡើង Youtube ហើយមកទល់ពេលនេះ មានអ្នកទស្សនា ៥.៧០០លើក (ដោយសារមូលហេតុ ច្រើនទើបរើទម្លាក់ចេញវិញ) ប៉ុន្តែគ្មានអ្នកណាមានយោបល់អ្វីទេ ។ ថ្មីៗនេះគាត់ឃើញកាសែតសរសេរថា ជនជាតិអង់គ្លេសម្នាក់ បានចុះផ្សាយព័ត៌មានថា បានរកឃើញ MH 370 នៅក្នុងព្រៃក្រាស់ ប្រទេសកម្ពុជា ។ តាមរូបភាព Clip ដែលគេបង្ហោះនោះ គាត់ឃើញ Clip របស់គេស្រដៀងនឹង Clip របស់គាត់ ហើយមានសញ្ញាកែសម្រួលខ្លះ ។ ដូច្នេះទើបគាត់សម្រេចប្រកាសព័ត៌មាននេះប្រាប់ទៅកាសែត Gialai Online ។
ខណៈដែលជនជាតិអង់គ្លេស Ian Wilson បានផ្សាយព័ត៌មានពីប៉ុន្មានថ្ងៃមុន មានលក្ខណៈខុសគ្នានឹងព័ត៌មានរបស់ពលរដ្ឋរូបនេះ ទើបកាសែត Gialai Online បានសម្រេចប្រកាសផ្សាយជាសាធារណៈ ។
តាមនោះយន្តហោះត្រូវបានអះអាងថាជា MH 370 ត្រូវបានបុរសសញ្ជាតិវៀតណាមរកឃើញមានប្រវែង ៦០,៧៨ម៉ែត្រ ប្រវែងពីចុងស្លាបម្ខាងទៅម្ខាងទៀតគឺ ៣១.២៣ម៉ែត្រ យន្តហោះនៅទាំងមូល ក្បាលសំយ៉ុងចុះក្នុងបាតបឹង ។ ប្រវែងនេះស្មើនឹងយន្តហោះ MH 370 ដែលក្រុមហ៊ុនអាកាសចរណ៍ម៉ាឡេស៊ីបានប្រកាស ។ យន្តហោះបានធ្លាក់ចុះទឹកជម្រៅប្រមាណ ៣០ម៉ែត្រ អាចកប់ក្នុងល្បាប់ ៥-៦ម៉ែត្រ ពុំមែនស្ថិតក្នុងព្រៃក្រាស និងក្នុងទឹកដីកម្ពុជាទេ ។
តាមរយៈរូបភាពគេឃើញ ស្លាបយន្តហោះមានលក្ខណៈកំពិតវៀចមើលពុំច្បាស់ បញ្ជាក់មុនពេលធ្លាក់ដល់បឹង វាបានប៉ះទង្គិចស្រាលជាមួយដើមឈើព្រៃ ឬលិចជ្រៅទៅក្នុងដីល្បាប់ ។
យន្តហោះ MH 370
ចំណុចសំខាន់ជាងគេគឺទីតាំងធ្លាក់នៃ MH 370 ដែលលោកសន្និដ្ឋានវាស្ថិតនៅកៀកជាមួយអ័ក្សហោះហើរ ពីម៉ាឡេស៊ី ទៅប៉េកាំង ហើយនៅមិនឆ្ងាយប៉ុន្មានពីចំណុចបាត់សញ្ញាទាក់ទងរបស់យន្តហោះ ។
បុរសរូបនេះប្រាប់បន្ថែមថា ៖ ពេលដែលម៉ាឡេស៊ី កំពុងប្រឹងប្រែងរុករកនោះមានព័ត៌មានជាច្រើនត្រូវបានគេលើកឡើង ធ្វើឲ្យលោកមន្ទិលសង្ស័យនឹងរូបភាពដែលលោកបានថតទុកពេលប្រទះឃើញដោយចៃដន្យនោះ ។
ចុងក្រោយបុរសរូបនេះអះអាងថា ៖ ត្រូវការពេលតែ ២-៣ថ្ងៃប៉ុណ្ណោះ គឺអាចរកឃើញទីតាំងយន្តហោះដែលអាចជា MH 370 នោះហើយ ។ ប្រសិនបើរដ្ឋាភិបាលរបស់ម៉ាឡេស៊ីអះអាងឡើងវិញពីរង្វាន់ ៧០លានដុល្លារនោះ លោកនឹងចំណាយលុយផ្ទាល់ខ្លួន សុំច្បាប់អនុញ្ញាតរៀបចំកម្លាំងមុជស្វែងរក ។ល។ ប្រសិនបើពុំត្រឹមត្រូវថាជា MH 370 ទេ នោះម៉ាឡេស៊ីគ្មានបាត់បង់អ្វីហើយចំណាយទាំងស្រុងជាបន្ទុករបស់លោក ៕
ចន្ទ្រា
