The Sun បានរាយការណ៍ថា និស្សិតស្រីម្នាក់ បង្ខំចិត្តត្រូវកាត់មេដៃរបស់នាងចោល បន្ទាប់ពីវាបានកើតជាជំងឺមហារីកដ៏កម្រមួយប្រភេទ ដែលត្រូវបានជឿថាពាក់ព័ន្ធទៅនឹងការខាំក្រចករបស់នាង ។
ជាក់ស្តែង នាង Courtney Whithorn មកពី The Gold Coast (អូស្រ្តាលី) បានចាប់ផ្តើមមានទម្លាប់ខាំក្រចករបស់នាង នៅពេលនាងត្រូវបានគេសម្លុតបំភ័យនៅសាលារៀន ក្នុងអាយុ ១៦ ឆ្នាំ ។ ជាអកុសល ទម្លាប់ខាំក្រចករបស់នាង បានវិវត្តកាន់តែអាក្រក់ ហើយនៅក្នុងឆ្នាំ២០១៤ នាងសូម្បីខាំបំបែកមេដៃទាំងមូល ហើយវាពុំលូតលាស់ល្អប្រសើរវិញនោះទេ ។
បន្ទាប់ពីនោះ នាងព្យាយាមលាក់បាំងរឿងនេះមិនឲ្យនរណាដឹងនោះទេ អស់រយៈពេល ៤ ឆ្នាំ ប៉ុន្តែ នៅពេលវាចាប់ផ្តើមប្រែជាឡើងខ្មៅ ចុងក្រោយ នាងក៏បានបង្ហាញវាឲ្យឪពុកម្តាយរបស់នាងដឹង ។ នាងសូម្បីបន្សល់ទុកស្បែករបស់នាងនៅខាងក្រោមក្រចករបើក ។
នាងនិយាយថា៖ «ខ្ញុំតែងលាក់បាំងវានៅក្នុងប្រអប់ដៃ ព្រោះខ្ញុំមិនចង់ឲ្យនរណាឃើញវា សូម្បីតែឪពុកម្តាយរបស់ខ្ញុំ» ។
«ខ្ញុំមានការភ្ញាក់ផ្អើលយ៉ាងខ្លាំង នៅពេលស្បែករបស់ខ្ញុំបានចាប់ផ្តើមប្រែជាខ្មៅ ដូច្នេះ ខ្ញុំបានបង្ហាញពួកវាជាលើកដំបូងនៅក្នុងឆ្នាំនេះ (២០១៨) ។ ខ្ញុំសូម្បីពុំអាចពន្យល់ពីអារម្មណ៍ខ្លួនឯងយ៉ាងម៉េចទេ ។ ខ្ញុំតែងមានក្រចកក្លែងក្លាយ ដើម្បីបិតបាំងវា ព្រោះវាឡើងខ្មៅខ្លាំងពេក ។ វាដូចជាក្រដាស នៅពេលណាដែលវាលូតលាស់» ។
នៅខែកក្កដា ឆ្នាំ ២០១៨, Courtney ត្រូវបានធ្វើរោគវិនិច្ឆ័យរកឃើញថាមានជំងឺមហារីកស្បែកប្រភេទ Melanoma ដែលអាចត្រូវបានបង្កឡើងដោយរបួសធ្ងន់ធ្ងរ នៅពេលដែលនាងបំបែកក្រចកដៃទាំងមូលរបស់នាង ។
ចាប់តាំងពីត្រូវបានធ្វើរោគវិនិច្ឆ័យ, Courtney បានទទួលការវះកាត់ចំនួន ៤ លើក ក្នុងក្តីសង្ឃឹមថាអាចសង្គ្រោះមេដៃរបស់នាងវិញ ប៉ុន្តែ នាងត្រូវបានបង្ខំកាត់វាចោលកាលពីសប្តាហ៍មុន ព្រោះនៅតែមានកោសិកាមហារីកនៅក្នុងស្បែករបស់នាង ៕ ចន្ទី (worldofbuzz)
