ភ្នំពេញ ៖ លោក សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងក្នុងកិច្ច ប្រជុំវិមជ្ឈការ និងវិសហមជ្ឈការស្តីពីការផ្ទេរមុខងារ និងធនធាន(ការផ្តល់សេវារដ្ឋបាលរបស់ក្រសួងបរិស្ថាន) ជូនរដ្ឋបាលថ្នាក់ក្រោមជាតិ នៅទីស្តីការក្រសួងបរិស្ថាន ថា នៅក្នុងរដ្ឋាភិបាលអណត្តិថ្មីនេះ ក្រសួង បរិស្ថាននឹងជំរុញបន្ថែមទៀតដល់ការអនុវត្តមុខងារតួនាទីគ្រប់វិស័យ ក៏ដូចជាការឆ្លើយតបទៅ នឹងយុទ្ធសាស្ត្រ ដែលក្រសួងបានដាក់ចេញកន្លងមកទៅឱ្យថ្នាក់ក្រោមជាតិ និងពិភាក្សាគ្នាការអនុវត្តមុខ ងារសាធារណៈនេះទៅដល់ក្រុងទាំង២៦ និងស្រុក ក្នុងការជួយរដ្ឋបាលថ្នាក់ក្រោមជាតិក្នុងការគ្រប់គ្រង បរិស្ថាន ដូចជា ការគ្រប់គ្រងសំរាម ប្រព័ន្ធលូ ដើម្បីកិច្ចគាំពារបរិស្ថាន។
លោក រដ្ឋមន្ត្រីក្រសួងបរិស្ថាន មានប្រសាន៍ដែរថា មុខងារសាធារណៈ គឺត្រូវមានការទទួលខុសត្រូវនូវអ្វី ដែលបានចែងក្នុងអនុក្រឹត្យក្នុងការកំណត់មុខងារសាធារណៈរបស់ក្រសួងបរិស្ថាន កំណត់មុខងារសាធារណៈរបស់មន្ទីរ ដែលជាសេនាធិការឱ្យថ្នាក់ខេត្ត ថាតើត្រូវប្រែក្លាយមុខងារ យុទ្ធសាស្ត្រ និងយុទ្ធវិធីបែបណា ដើម្បីការអនុវត្ត ដើរឱ្យឆ្លើយតបទៅនឹងផែនការក្រសួង ធ្វើយ៉ាងណា ដើរឱ្យទាន់ទៅនឹងតម្រូវការសង្គម ដែលទាមទារឱ្យរដ្ឋបាលសាធារណៈនេះ មានភាពឈ្លៀសវៃ និងមានប្រសិទ្ធភាព ឆ្លើយតបបានឆាប់រហ័សទៅនឹងសេចក្តីត្រូវការរបស់សង្គមយើងបច្ចុប្បន្ន។
សូមបញ្ជាក់ថា កិច្ចប្រជុំវិមជ្ឈការ និងវិសហមជ្ឈការស្តីពីការផ្ទេរមុខងារ និងធនធាន(ការផ្តល់សេវារដ្ឋបាលរបស់ក្រសួងបរិស្ថាន) ជូនរដ្ឋបាលថ្នាក់ក្រោមជាតិ បានប្រព្រឹត្តទៅនៅព្រឹកថ្ងៃច័ន្ទ ១កើត ខែភទ្របទ ឆ្នាំច សំរឹទ្ធិស័ក ស.ព ២៥៦២ ត្រូវនឹងថ្ងៃ ទី១០ ខែកញ្ញា ឆ្នាំ២០១៨ នាទីស្តីការក្រសួងបរិស្ថាន ក្រោមអធិបតីភាព លោក សាយ សំអាល់ រដ្ឋមន្ត្រីក្រសួងបរិស្ថាន និង ការចូលរួមពីថ្នាក់ដឹកនាំគ្រប់ជាន់ថ្នាក់នៃក្រសួងបរិស្ថាន ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ មន្ទីរបរិស្ថានទាំង២៥ រាជធានី -ខេត្តក្រុង ដើម្បីជំរុញ និងលើកកម្ពស់ការ អនុវត្តការគ្រប់គ្រងសំរាមទីប្រជុំជនក្រុងឱ្យមានប្រសិទ្ធភាព៕ ដោយ ៖ បញ្ញាស័ក្តិ
