យោងតាម Sinar Harian ហេតុការណ៍ដ៏រន្ធត់នេះ បានកើតឡើងនៅវេលាម៉ោងប្រហែល ១០ យប់ នៅពេលដែលក្មេងប្រុសឈ្មោះ Muhammad Haikal Hakimi Mohd Noor អាយុ ១៧ ឆ្នាំ និងម្នាក់ទៀតឈ្មោះ Mohmad Haziq Ishak អាយុ ១៧ ឆ្នាំដូចគ្នា កំពុងជិះម៉ូតូ ទៅកាន់ទីកន្លែងមិត្តភក្តិរបស់ពួកគេ នៅ Taman Seri Serdang ប្រទេសម៉ាឡេស៊ី ។ ពួកគេពុំដឹងថា ស្ពាននៅទីនោះអាចបាក់ស្រុត រហូតធ្វើឲ្យពួកគេត្រូវធ្លាក់ចូលក្នុងគំនរបាក់បែក នៅក្នុងទន្លេ Serdang នោះទេ ។
ក្មេងប្រុសជំទង់ទាំងពីរ ត្រូវបានគ្របដណ្តប់ក្នុងគំនរបាក់បែក នៅពេលដែលក្រុមសង្គ្រោះបានរកឃើញពួកគេ ។ ក្រុមសង្គ្រោះនិយាយថា ពួកគេត្រូវបានផ្តល់ព័ត៌មានអំពីហេតុការណ៍នេះ នៅវេលាម៉ោង ១០ និង ២៧ នាទី យប់ ហើយបានប្រញាប់ប្រញាល់ដាក់ពង្រាយក្រុមពន្លត់អគ្គីភ័យចំនួន ១១ នាក់ ទៅកាន់កន្លែងកើតហេតុ ដើម្បីសង្គ្រោះក្មេងរងគ្រោះទាំងពីរ ។
ប្រតិបត្តិការសង្គ្រោះត្រូវចំណាយពេលប្រហែល ២ ម៉ោង ខណៈក្រុមពន្លត់អគ្គីភ័យត្រូវប្រើចប ដើម្បីជីកកកាយបំណែកថ្មបាក់បែក ដើម្បីចូលទៅដល់ពួកគេ ដែលត្រូវបានកប់នៅខាងក្រោម ។ ទីបំផុត នៅវេលាម៉ោង ១២ និង ១៥ នាទី (AM) ពួកគេបានរកឃើញក្មេងប្រុសទី១ ប៉ុន្តែ គាត់បានស្លាប់បាត់ទៅហើយ ។ សាកសពក្មេងប្រុសទី២ ត្រូវបានរកឃើញ ៥ នាទីក្រោយមក ហើយអ្នកទាំងពីរត្រូវបានប្រកាសស្លាប់នៅកន្លែងកើតហេតុ ៕ ឧត្តម (worldofbuzz)