ថ្លែងលើវេទិកាសេដ្ឋកិច្ចប៉ែកបូព៌ា កាលពីថ្ងៃទី១២កញ្ញាម្សិលមិញនេះនៅទីក្រុងVladivostok ប្រធានាធិបតីរុស្ស៊ី Vladimir Putin និយាយថា កូរ៉េខាងជើងបានបោះជំហានសកម្មមួយចំនួនក្នុងការអនុវត្តរំសាយនុយក្លេអ៊ែរ ហើយរង់ចាំមើលការឆ្លើយតបរបស់ អាមេរិក។មេដឹកនាំរុស្ស៊ីចាត់ទុកថា ការសន្យាទាំងឡាយនឹងពុំមានប្រសិទ្ធភាពឡើយ ប្រសិនបើមានតែភាគីម្ខាងអនុវត្តន៍បានច្រើន ក្នុងពេលដែលភាគីម្ខាងទៀតគ្មានបង្ហាញសុច្ឆន្ទៈអ្វីទាំងអស់។
Reuters បានដកស្រង់សម្ដី Putin ថា៖ ប្រសិនបើកូរ៉េខាងបានបោះជំហានមួយចំនួនក្នុងការរំសាយនុយក្លេអ៊ែរ នោះ ពួកគេក៏នឹងសង្ឃឹមទទួលបានសំណងឆ្លើយតបស័ក្ដិសម ពុំមែនចេះតែសំណូមពរជាបន្ដបន្ទាប់ឱ្យរំសាយនុយក្លេអ៊ែរទាំងស្រុងនោះទេ។
ម្យ៉ាងវិញទៀតកូរ៉េខាងជើងត្រូវទទួលបាននូវកិច្ចសន្យាដើម្បីធានារ៉ាប់រងសន្ដិសុខដល់ប្រទេសនេះ។លោកPutinពោល៖សហគមន៍អន្តរជាតិចាំបាច់ត្រូវលើកឡើងនូវការសន្យាបែបនេះចំពោះកូរ៉េខាងជើងដើម្បីឆ្លើយតបនូវកិច្ចប្រឹងប្រែងរំសាយនុយក្លេអ៊ែររបស់ពួកគេ។ ក្នុងកិច្ចព្រមព្រៀងនោះចាំបាច់ត្រូវមានកិច្ចសន្យារបស់បណ្ដាមហាអំណាចនុយក្លេអ៊ែរ ។រុស្ស៊ីក៏ជាភាគីមួយចូលរួមក្នុងកិច្ចចរចា ប៉ុន្ដែប្រសិនបើកូរ៉េខាងជើងត្រូវការត្រឹមតែកិច្ចសន្យាសន្ដិសុខរបស់អាមេរិកនោះ យើងខ្ញុំក៏នឹងស្វាគមន៍។ ប៉ុន្តែកណីបែបនេះប្រាកដជាពិបាកកើតឡើង យើងចាំបាច់ត្រូវប្រាកដនិយម។ខ្ញុំជឿថា បណ្ដាការសន្យារបស់សហគមន៍អន្ដរជាតិក្នុងករណីនេះវាសមស្របជាង។
នៅក្នុងវេទិកានេះដែរ ប្រធានាធិបតី Putin ក៏បានឱ្យដឹងថា មេដឹកនាំកូរ៉េខាងជើងអាចមកទស្សនកិច្ចរុស្ស៊ីក្នុងពេលវេលាណាក៏ដោយដែលងាយស្រួលសម្រាប់គាត់ ព្រោះតែយើងខ្ញុំបានអញ្ជើញគាត់ ដូច្នេះគាត់អាចមកទស្សនកិច្ចរុស្ស៊ីនៅវេលាសមស្របណាមួយក៏បាន៕
សូយន
