នៅថ្ងៃទី១២ខែកញ្ញា ប្រមុខការទូតបារាំង Jean-Yves Le Drian ព្រមានថា ការវាយឆ្មក់ពីដែនអាកាសពាសវាលពាសកាលរបស់កងកម្លាំងរុស្ស៊ី ស៊ីរីនិងអ៊ីរ៉ង់នៅខេត្តIdlib អាចប្រហាក់ប្រហែលនឹងឧក្រិដ្ឋកម្មសង្រ្គាម។
ថ្លែងទៅកាន់អ្នកតំណាងរាស្ដ្រក្នុងរដ្ឋសភា ប្រមុខការទូតបារាំងរូបនេះសង្កត់ធ្ងន់ថា៖ «មិនអាចទាត់ចោលករណីជាឧក្រិដ្ឋកម្មសង្រ្គាម…គ្រាដែលបណ្ដាភាគីចាប់ផ្ដើមធ្វើការទម្លាក់គ្រាប់ពាសវាលពាសកាលសំដៅទៅលើពលរដ្ឋសាមញ្ញនិងបណ្ដាមន្ទីរពេទ្យ»។
តាមលោកនោះ គឺបណ្ដាភាគីចាំបាច់ត្រូវមានកិច្ចប្រឹងប្រែងភ្លាមៗ សំដៅបញ្ចៀសពីវិបត្តិមនុស្សធម៌។
នៅថ្ងៃដដែលនោះ រដ្ឋមន្ដ្រីការពារជាតិអាល្លឺម៉ង់Ursula von der Leyen អះអាងថា ក្រុងBerlin និងប្រទេសដទៃៗទៀតត្រូវរកគ្រប់វិធីដើម្បីបញ្ចប់ការប្រើប្រាស់អាវុធគីមីនៅស៊ីរី៕
សូយន
