ភ្នំពេញ ៖ នាថ្ងៃពុធ ទី១២ ខែកញ្ញា ឆ្នាំ២០១៨ វេលាម៉ោង ០៤និង០០ រសៀល នៅទីស្តីការក្រសួងសុខាភិបាល លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអនុញ្ញាតឱ្យ លោកស្រី Sithy Rizvina de Alwis តំណាងមូលនិធិអង្គការសហប្រជាជាតិដើម្បីប្រជាជន (UNFPA) ប្រចាំកម្ពុជា ដែលទើបចូលកាន់តំណែងថ្មីចូលជួបសម្តែងការគួរសមនិងពិភាក្សាការងារ។
លោករដ្ឋមន្ត្រី ក្រសួងសុខាភិបាល បានសម្តែងការស្វាគមន៍ចំពោះ លោកស្រី Sithy Rizvina de Alwis ដែលត្រូវបានតែងតាំងជាតំណាងមូលនិធិអង្គការសហប្រជាជាតិដើម្បីប្រជាជន (UNFPA) ប្រចាំកម្ពុជា ហើយ លោករដ្ឋមន្ត្រី ក៏បានថ្លែងអំណរគុណចំពោះ អង្គការ UNFPA ដែលតែងតែផ្តល់ការឧបត្ថម្ភគាំទ្រដល់វិស័យសុខាភិបាលកម្ពុជា ជាពិសេសដល់កម្មវិធី សុខភាពបន្តពូជ សុខភាពមាតា ទារកនិងកុមារ។
លោកស្រីតំណាងមូលនិធិអង្គការសហប្រជាជាតិដើម្បីប្រជាជន (UNFPA) ប្រចាំកម្ពុជា បានសម្តែងអំណរគុណ ដល់ក្រសួងសុខាភិបាល ជាពិសេសចំពោះភាពដឹកនាំរបស់ លោករដ្ឋមន្ត្រី ដែលតែងតែសហការនិងគាំទ្រគម្រោងរបស់អង្គការ UNFPA។
លើសពីនេះ លោកស្រីប្រធានអង្គការ បានជម្រាបជូនថា ការគាំទ្ររបស់អង្គការ UNFPA បានចូលរួមចំណែកក្នុងការកាត់បន្ថយអត្រា មរណភាពរបស់មាតា ទារកនិងកុមារ នៅកម្ពុជា ក៏ដូចជាបានធ្វើឱ្យប្រសើរឡើង ស្ថានភាពសុខភាពបន្តពូជ ក៏ដូចជាសុខភាពមាតា ទារកនិងកុមារ។ លើសពីនេះទៀត លោកស្រីប្រធានអង្គការ បានស្នើសុំលោករដ្ឋមន្ត្រី បន្តការគាំទ្រលើគម្រោងផែនការសកម្មភាពប្រចាំប្រទេសរបស់អង្គការ UNFPA 2019-2023 ជាបន្តទៀត។
ជាការឆ្លើយតបលោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះ លោកស្រីតំណាងមូលនិធិអង្គការសហប្រជាជាតិដើម្បីប្រជាជន (UNFPA) ប្រចាំកម្ពុជា ហើយក្រសួងសុខាភិបាលត្រៀមខ្លួនរួចជាស្រេច ដើម្បីបន្តការគាំទ្រ និងសហការជាមួយអង្គការ UNFPA ដើម្បីឈានទៅសម្រេចឱ្យបានការកាត់បន្ថយអត្រាមរណភាពមាតា ទារកនិងកុមារបន្ថែមទៀត និងជាពិសេសធ្វើ ឱ្យប្រសើរឡើងស្ថានភាពសុខភាពបន្តពូជ សុខភាពមាតា ទារកនិងកុមារ៕ ដោយ ៖ បញ្ញាស័ក្តិ
