បុរសម្នាក់កាលពីពេលថ្មីៗនេះ បានស្លាប់យ៉ាងអាណោចអាធម បន្ទាប់ពីបានការពារម្តាយរបស់គាត់ មិនឲ្យចោរប្រដាប់ដោយកាំបិតប្លន់នៅឯផ្សារមួយកន្លែង ស្ថិតនៅភាគខាងជើងនៃប្រទេសចិន កាលពីចុងសប្តាហ៍មុននេះ ។
យោងតាម ThePaper ដកស្រង់អត្ថបទចេញពីកាសែត South China Moring Post បានឲ្យដឹងថា ហេតុការណ៍នេះបានកើតឡើងកាលពីថ្ងៃសៅរ៍ នៅផ្សារបន្លែមួយស្ថិតក្នុងស្រុក Wuji ខេត្ត Hebei ប្រទេសចិន នៅពេលដែលកូនប្រុសអាយុ ២៣ ឆ្នាំ ដ៏ក្លាហានម្នាក់ បានសម្រេចឈរពាំងម្តាយរបស់គាត់ ដើម្បីសង្គ្រោះម្តាយពីចោរប្លន់ម្នាក់ ។
ស្ត្រីម្នាក់ដែលឈ្មោះរបស់នាង ពុំត្រូវបានបញ្ចេញនៅក្នុងរបាយការណ៍ បានស្នើកូនប្រុសរបស់នាង ជូននាងទៅផ្សារ ព្រោះនាងមុននេះ បានកើតមានជម្លោះជាមួយចោរឆក់កាបូបម្នាក់កាលពីពីរបីថ្ងៃមុនៗ ពេលហេតុការណ៍សោកនាដកម្មនេះកើតឡើង ។ ជាធម្មតា នាងបានឡើងផ្សារ ដោយនាំយកជាមួយលុយប្រហែល ២០០០ យន់ (២៩០ ដុល្លារ) ដើម្បីទិញសាច់ និងបន្លែ ។
ស្ត្រីនេះ ដែលជាម្ចាស់ហាងលក់គ្រឿងភេសជ្ជៈក្នុងភូមិ បានគិតថា៖ «ពួកចោរឆក់ គ្រាន់តែផ្តោតគោលដៅស្ត្រីប៉ុណ្ណោះ និងពុំមានអារម្មណ៍ភ័យខ្លាចជាមួយកូនប្រុសរបស់ខ្ញុំនៅទីនោះទេ» ។ ទោះយ៉ាងណា ចោរនោះពុំរួញរាទេ ទោះបីឃើញកូនប្រុសរបស់នាងនៅជាមួយនាងនៅខណៈពេលនោះក៏ដោយ ។
ខណៈស្ត្រីនោះបានកំពុងដើរវិលត្រឡប់ទៅកាន់រថយន្តរបស់នាង នៅពេលនោះចោរអាយុ ៣២ ឆ្នាំ ម្នាក់ បានព្យាយាមតាមឆក់កាបូបរបស់នាងតែម្តង ។ បន្ទាប់ប៉ុនប៉ងបរាជ័យ នាងភ្លាមៗនោះក៏បានរត់សំដៅរថយន្តរបស់នាង ទីកន្លែងដែលកូនប្រុសរបស់នាងកំពុងរង់ចាំខាងក្នុង ។ នៅពេលឃើញម្តាយរបស់ខ្លួនរត់ កូនប្រុសនោះក៏បានស្ទុះចេញពីរថយន្ត និងរត់សំដៅម្តាយ ដើម្បីរុញចោរចេញ ។
ជាអកុសល ខណៈពេលប្រឈមមុខនោះ ចោរកំពុងកាន់អាវុធនៅនឹងដៃរបស់វា ។
ស្ត្រីជាម្តាយបានប្រាប់អ្នកសារព័ត៌មានថា៖ «ខ្ញុំបានប្រាប់កូនប្រុសខ្ញុំ ឲ្យរត់ចេញ តែគាត់មិនព្រមរត់ទេ ។ ផ្ទុយទៅវិញ គាត់បានទាញខ្ញុំឲ្យនៅពីខាងក្រោយខ្នងរបស់គាត់ ។ នាងបន្តថា៖ «កូនប្រុសរបស់ខ្ញុំពុំដែលវាយតប់ជាមួយអ្នកណាម្នាក់ទេ ពីមុនមក ។ គាត់ក៏ពុំបានលាក់ខ្លួន ហើយជំនួសឲ្យការឈរពាំងមុខខ្ញុំ ដើម្បីការពារខ្ញុំ» ។
ស្ត្រីរងគ្រោះបន្តឲ្យដឹងទៀតថា៖ «ខ្ញុំបានឃើញបុរសនោះចាក់កូនប្រុសរបស់ខ្ញុំច្រើនលើក ។ កូនប្រុសរបស់ខ្ញុំបានដួលទៅនឹងដី ជាមួយដៃខ្ទប់បេះដូងគួរឲ្យអាសូរបំផុត» ។
ក្រៅពីអំពើឃាតកម្មនេះ ជនសង្ស័យនោះក៏បានបង្កឲ្យមនុស្សដទៃទៀតរងរបួសផងដែរ នៅពេលដែលអ្នកស្រុកនៅទីនោះ បានចូលអន្តរាគមន៍ ហើយបង្ក្រាបវា ។ គ្រប់គ្នាបានធ្វើការរួមគ្នា ដើម្បីចាប់ជនសង្ស័យ រហូតទល់ប៉ូលីសមកដល់ ។ បុគ្គលរងរបួសម្នាក់ក្រោយមក ត្រូវបានបញ្ជូនទៅកាន់មន្ទីរពេទ្យ ដើម្បីព្យាបាលរបួស ។
ក្រោយហេតុការណ៍ដ៏សាហាវនេះកើតឡើង សាធារណៈជនបានជួយរៃអង្គាសបានប្រាក់ចំនួន ២០០០ យន់ (២៩០ ដុល្លារ) ជាទឹកប្រាក់ឧត្ថម្ភសម្រាប់គ្រួសារនេះដែលបុរសនោះបានរងរបួសដោយសារលទ្ធផលនៃហេតុការណ៍នេះ ។ គាត់មានប្រពន្ធ និងកូនស្រី២នាក់ ៕ ឧត្តម (nextshark)