វីដេអូមួយដែលបង្ហាញពីសកម្មភាពយុវជន ៦ នាក់ នៅក្នុងភូមិជនបទមួយនៅក្នុងប្រទេសភូមា ប្រកួតសីឡក់ (sepak takraw) បានកំពុងទទួលការចាប់អារម្មណ៍ និងកោតសរសើរជាខ្លាំង ពីសំណាក់អ្នកប្រើប្រាស់បណ្តាញសង្គម ជាមួយជំនាញលេងដ៏មិនធម្មតារបស់ពួកគេ បើទោះបីជាពួកគេពុំមែនជាកីឡាករថ្នាក់ជាតិក៏ដោយ ។
ជាកីឡាមួយប្រភេទដែលមានដើមកំណើតនៅក្នុងតំបន់អាស៊ីអាគ្នេយ៍ នោះ Sepak Takraw (សីប៉ាក់តាក្រ) ដែលកម្ពុជាហៅថាសីដក់ ឬ ស៊ីមេលោង មានលក្ខណៈស្រដៀងគ្នានឹងកីឡាបាល់ទះផងដែរ ដោយប្រើប្រាស់កូនបាល់តូចមួយ ដែលត្រូវបានចាក់ក្រងពីសំបកប្ញស្សី ឬ ផ្តៅ ។
នៅក្នុងកីឡាសីដក់នេះ នោះអ្នកលេងទាំងសងខាងត្រូវបានអនុញ្ញាតឲ្យប្រើប្រាស់ជើង, ទ្រូង, ស្មា, ជង្គង់ និងក្បាលរបស់ពួកគេ ដើម្បីបញ្ជាបាល់រកពិន្ទុ ។ ប៉ុន្តែ បច្ចេកទេសដ៏ព្រឺព្រួចនេះ គឺតម្រូវឲ្យអ្នកលេងមានជំនាញ និងទេពកោសល្យកាយសម្ព័ន្ធ ដើម្បីអាចធ្វើការប្រកួតបានយ៉ាងរលូន ។
ប៉ុន្តែ សម្រាប់យុវជនជនបទទាំងនេះវិញ ពិតជាបានធ្វើឲ្យមនុស្សជាច្រើនកោតសរសើរជាខ្លាំង ដែលពួកគេអាចលេងបានយ៉ាងអស្ចារ្យ បើទោះជាពួកគេពុំបានឆ្លងកាត់ការហ្វឹកហាត់ដូចជាកីឡាករថ្នាក់ជាតិក៏ដោយ ។
ឃ្លីបវីដេអូនេះ ត្រូវបានបង្ហោះនៅលើ Instagram ដោយ លោក Dave Leduc ជាសិល្បករពោរពេញដោយក្បាច់ប្រយុទ្ធចម្រុះជនជាតិកាណាដា កាលពីដើមសប្តាហ៍នេះ ៕ ឧត្តម (nextshark)