អ្នកស្រុកបាននាំគ្នាភ្ញាក់ផ្អើលយ៉ាងខ្លាំង បន្ទាប់ពីពួកគេប្រទះឃើញសាកសពសត្វឆ្កែ និងឆ្មា១គូ ស្ថិតនៅខាងក្រៅនៃអគារខ្ពស់មួយនៅ Chongqing ក្នុងប្រទេសចិន កាលពីថ្ងៃព្រហស្បតិ៍ សប្តាហ៍មុន ។ មនុស្សជាច្រើនសង្ស័យថា សត្វងាប់ទាំង២ក្បាលនេះ ត្រូវបានបោះទម្លាក់ពីអគារនោះ ក្នុងអំឡុងជម្លោះក្នុងគ្រួសារមួយរវាងប្តី និងប្រពន្ធមានផ្ទៃពោះ ។
ហេតុការណ៍នេះត្រូវបានគេរាយការណ៍ថា បានកើតឡើងកាលពីថ្ងៃទី៦ កញ្ញា វេលាម៉ោងប្រហែល ៥ ល្ងាច នៅពេលដែលស្ត្រីម្នាក់បានលឺស្នូរធ្លាក់ខ្លាំងមួយនៅលើដី ខណៈនាងកំពុងបណ្តើរសត្វឆ្កែរបស់នាង នៅក្បែរអគារខ្ពស់មួយ ។
នាងពិតជាភ្ញាក់ផ្អើលជាខ្លាំង នៅពេលនាងបានឃើញសត្វ២ក្បាល (ឆ្កែ១ និងឆ្មា១) កំពុងដេកបាត់បង់ជីវិតទៅហើយ នៅលើដី, នេះបើយោងតាម Shanghaiist ។
នៅក្នុងឃ្លីបដែលត្រូវបានបង្ហោះនៅលើបណ្តាញសង្គម ស្ត្រីម្នាក់អាចត្រូវបានលឺស្រែកយំ ខណៈនាងព្យាយាមទៅអង្អែលក្បាលសត្វឆ្កែដែលកំពុងដេកនៅលើដី ។
នៅពេលនាងបានព្យាយាមទៅជួបម្ចាស់សត្វទាំងពីរ បុរសម្នាក់បានបញ្ជាក់ថា គាត់មិនខ្វល់អំពីសត្វទាំងនេះទេ ហើយថា ពួកគេអាចធ្វើអ្វីក៏ដោយ ដែលពួកគេចង់ធ្វើជាមួយពួកវា ។ ទីបំផុត ស្ត្រីនោះក៏បានយកភួយមករុំសាកសពសត្វងាប់ទាំងពីរ និងយកពួកវាទៅកប់នៅកន្លែងមួយក្បែរនោះ ។
អ្នកសារព័ត៌មានបានព្យាយាមទៅជួបផ្ទាល់ម្ចាស់សត្វទាំងពីរ មួយថ្ងៃបន្ទាប់ ដែលជាផ្នែកមួយនៃការស៊ើបអង្កេតនូវអ្វីដែលបានកើតឡើង ប៉ុន្តែ គ្មានប្រយោជន៍នោះទេ ។ ទោះយ៉ាងណា អ្នកកាសែតបានលឺពាក្យចចាមអារាមតៗគ្នាថា បុរសនោះពុំចង់រក្សាទុកសត្វទាំងពីរក្បាលនេះនៅក្នុងផ្ទះរបស់ពួកគេទេ បន្ទាប់ពីរកឃើញប្រពន្ធរបស់គាត់មានផ្ទៃពោះ ។
បើតាមប្រភពមួយឲ្យដឹង នេះអាចប្រហែលជាមូលហេតុបណ្តាលឲ្យសត្វឆ្កែ និងឆ្មានេះ ត្រូវបានសម្លាប់ នៅពេលបុរសជាប្តីនោះបានបោះពួកវាទាំងពីរចេញពីអគារជាន់ទី២១ ។ អ្នកស្រុកក៏បានកត់សម្គាល់ឃើញថា សត្វឆ្មានោះមានគភ៌ បន្ទាប់ពីពួកគេបានឃើញសាកសពរបស់វា ។
ប៉ុន្តែ ប៉ុន្មានថ្ងៃបន្ទាប់ហេតុការណ៍នេះកើតឡើង ម្ចាស់សត្វទាំងពីរបានបញ្ចេញសារជូនដំណឹងមួយនៅអគារនោះ ដោយសុំទោសអំពីរឿងរ៉ាវនេះ ហើយបានអះអាងថា ការងាប់របស់សត្វឆ្មា និងឆ្កែនោះ គឺជា «គ្រោះថ្នាក់សុទ្ធសាធ» ។ ទោះយ៉ាងណា សេចក្តីជូនដំណឹងនេះ ពុំបានពន្យល់អំពីរបៀបដែលសត្វទាំងពីរគ្រប់គ្រងលោតចេញពីអាគារជាន់ទី២១នោះទេ ៕ ចន្ទី (nextshark)