នេះជាចំណងជើងចុះផ្សាយលើគេហទំព័រ Vietnamnet បង្ហោះផ្សាយនៅវេលាម៉ោង ១២និង១៣នាទី ថ្ងៃទី ១៣ ខែកញ្ញា ឆ្នាំ ២០១៨ នេះ ។
តាមនោះក្រុមអ្នកជំនាញការអាកាសចរណ៍ បានជួលឧទ្ធម្ភាចក្ររុករកយន្តហោះ MH 370 ក្នុងព្រៃក្រាស ប្រទេសកម្ពុជា ។
ផ្អែកតាមរូបភាពត្រូវបានរកឃើញតាមរយៈ Google Maps របស់ Ian Wilson ផលិតករវីដេអូ សញ្ជាតិអង់គ្លេស ដែលជឿជាក់ថា បានរកឃើញតម្រុយ MH 370 នៅតំបន់ព្រៃក្រៅរាជធានីភ្នំពេញ កម្ពុជា ។
តាមរយៈព័ត៌មានខាងលើមនុស្ស១ក្រុម ៣នាក់ រួមមាន Zorba Parer ទីប្រឹក្សាអាកាសចរណ៍ Narakang -ពាណិជ្ជករនៅមូលដ្ឋាន និងអ្នកកាសែត Michael Carr បានជួលឧទ្ធម្ភាចក្រតម្លៃ ៣០០០ដុល្លារ/ជើង ដើម្បីហោះហើរពីលើព្រៃស្វែងរក ។
ក្រុមអ្នកជំនាញការនេះបានស្វែងរកពីរយៈកម្ពស់ ១៥០ម៉ែត្រ ពីលើព្រៃ តែពុំប្រទះឃើញ MH 370 ទេ ។ ពួកគេជឿថាពពកក្រាស ឬពុំទាន់ចំកូអ័រដោណេ ទើបធ្វើឲ្យដំណើររុករកនេះបរាជ័យ ។
លោក Parer ធ្លាប់ធ្វើការឲ្យ NASA ប្រាប់ថា ៖ “យើងខ្ញុំប្រឹងសង្កេតរកបំណែករបស់យន្តហោះដែលអាចធ្លាក់ចុះនៅទីណាមួយនោះ តែពុំឃើញអ្វី ។ យើងខ្ញុំក៏ពុំបានឃើញតម្រុយនៃយន្តហោះ ឬសាកសពអ្វីទេ ។ អ្វីដែលយើងខ្ញុំឃើញគឺសុទ្ធសឹងភ្នំ និងឧទ្យានជាតិ ព្រមទាំងទីតាំងបរបាញ់សត្វព្រៃខុសច្បាប់” ។
លោក Parer និងសមាជិកក្រុមរុករក គឺជាជនដំបូងបានធ្វើការស្វែងរក MH 370 ពីលើអាកាស ដោយឧទ្ធម្ភាចក្រ ។ ដំបូងឡើយពួកគេចង់ស្វែងរកតាមថ្មើរជើង ប៉ុន្តែតំបន់ព្រៃនោះគ្រោះថ្នាក់ពេក ។
នៅក្នុងសប្តាហ៍នេះដែរ ក្រុមហ៊ុន Space View របស់ចិនក៏ប្រមូលផ្តុំការរុករក MH 370 ពីលំហ តែពួកគេក៏អះអាងថា ពុំទាន់ឃើញសញ្ញាណាមួយពីយន្តហោះដែលបាត់ស្រមោលយ៉ាងអាថ៌កំបាំងពីថ្ងៃទី ៨ ខែសីហា ឆ្នាំ ២០១៤ ៕ ចន្ទ្រា
